Алтынньы 16 күнүгэр Ил Дархан Айсен Николаев Муома оройуонугар сырытта. Бу туһунан бырабыыталыстыба пресс-сулууспата иһитиннэрэр.
Ол курдук, Айсен Сергеевич оройуоннааҕы киин балыыһаҕа сылдьан үлэһиттэри кытта көрүстэ. Ону таһынан, Хонуу нэһилиэгин орто оскуолатыгар ыалдьыттаата. Билигин манна 283 оҕо үөрэнэр. Оскуола дириэктэрэ Василина Тихонова 320 миэстэлээх, икки мэндиэмэннээх саҥа оскуола 2017 сыллаахха үлэҕэ киирбитин кэпсээтэ. Оҕолор үчүгэйдик үөрэнэллэригэр, сайдалларыгар бары усулуобуйа баарын бэлиэтээтэ. Ол курдук, киэҥ-куоҥ кылаастар, аактабай уонна успуорт саалалара, остолобуой уо.д.а. барыта баар. Оҕолор нууччалыы уонна сахалыы үөрэнэллэр эбит. Ону таһынан, эбээн тылын эбии үөрэтэллэр диэн оскуола дириэктэрэ иһитиннэрдэ. Айсен Сергеевич оҕолору кытта кэпсэттэ, оҕо сылдьан ким буолуон баҕарарын, ханнык куруһуоктарга сөбүлээн сылдьыбытын туһунан оскуолатааҕы хаһыат кэрэспэдьиэннэригэр интервью биэрдэ.
Ону таһынан, 1851 сыллаахха тутуллубут храмҥа сырытта. Белогорскай нефтебаза филиалын ньиэп ыскылаатын көрдө-иһиттэ. Бу ыскылаат нэһилиэнньэ энергетическэй куттала суох буолуутун хааччыйыыга анаан тутуллубут. Салгыы оройуон дьаһалтатыгар социальнай-экономическэй сайдыыга туһуламмыт мунньаҕы ыытта.
“Муома оройуона быйыл дойду бэрэсидьиэнэ Владимир Путин быһаарыытынан Арктическай оройуоннар састаабыгар киирбитэ. Төһө даҕаны ыарахан килиимэттээх, суол-иис туруга уустуктардаах буоллар, оройуон тэтимнээхтик сайдар. Чуолаан табаны иитиигэ үчүгэй көрдөрүүлээхтэр. Ону таһынан, күндү тааһы хостуур салааҕа ситиһиилэрдээхтэр. Ол курдук, манна 80 лицензия бэриллибитэ. Оройуоҥҥа үс улахан хампаанньа үлэлиир. Быйыл көмүһү хостуур былаан 1,5 төгүл туолбут. Бу күннэргэ Росгеологияны кытта түһэрсибит сөбүлэҥмит олоххо киирдэҕинэ, күндү тааһы хостуурга саҥа сирдэри булуу оройуон өссө тэтимнээхтик сайдарыгар кыах биэриэ диэммин эрэнэбин”, — диэн Айсен Николаев эттэ.
