М.К. Аммосов аатынан Хотугулуу-Илиҥҥи федеральнай университекка Африка дойдуларыттан 17 абитуриент туттарсаары бэлэмнэнэр. Бу туһунан университет пресс-сулууспата иһитиннэрэр.
Билиҥҥитэ университекка Бурундиттан, Египеттэн, Камерунтан, Сомалиттан, Зимбабветтан, Кот-д’Ивуартан, Намибияттан уо.д.а. дойдулартан 30-тан тахса Африка устудьуона билиини сомсор.
“Аҥардас идэтийбит үөрэх бырагырааматынан ХИФУга 39 киһи үөрэнэр. 2019 сылга идэтийбит үөрэхтээһиҥҥэ 30 киһи туттарсан киирбитэ, оттон үрдүк үөрэххэ тутарсыыга бэлэмниир факультекка – 17. Туттарсааччылар ордук мэдэссиинэ хайысхатыгар үөрэнэргэ дьулуһаллар. ХИФУ Мэдэссиинэ институтугар 34 африка устудьуона үөрэнэр. Омук устудьуоннара бары өттүнэн сайдалларыгар университет сөптөөх усулуобуйаны оҥорбута”, - диэнХИФУ норуоттар икки ардыларынааҕы сибээһин управлениетыгар кэпсииллэр.
Алтынньы 23-24 күннэригэр Сочига ыытыллыбыт “Россия-Африка” саммикка дойду бэрэсидьиэнэ Арассыыйа Африкаттан устудьуоннары үөрэттэрэргэ бэлэмин эппитэ. Дойду үөрэҕин министиэристибэтин дааннайдарынан, быйыл Арассыыйа үрдүк үөрэҕин кыһаларыгар Африка 49 дойдутуттан устудьуоннар кэлбиттэр.
Маны таһынан, В.Путин Африкаҕа баар Эфиопия диэн дьадаҥы дойду Арассыыйаҕа биэриэхтээх 163,6 мөл. дуоллар иэһин сотор туһунан иһитиннэрбитэ.
Путин “Арассыыйа—Африка” саммит буолаары турдаҕына, Москуба Африка дойдуларыгар өссө сэбиэскэй кэмтэн ыла мунньуллубут 20 млрд дуоллар иэстэрин соппутун санаппыта. Ону кини “маны биһиги аһынан дуу, “үтүө” аатыраары дуу буолбакка, дьиҥнээх балаһыанньаны учуоттаан оҥоробут. Бу дойдулар иэстэрин син биир төлүүр кыахтара суох, хаһан да төлүөхтэрэ да суоҕа. Оттон иэстэрэ сотуллубутун кэннэ, биһиги кинилэри кытта туох да хос санаата, иэһэ-күүһэ суох саҥалыы доҕордуу сыһыаны салҕаан барыахпытын сөп. Ол хайабытыгар да туһалаах” диир.
Сахалыы да толкуйдаатахха, сөпкө этэр. Быстар дьадаҥы, нэһиилэ тииһинэн олорор Мозамбиктан, Мадагаскартан, Танзанияттан, Эфиопияттан иэстэрин төттөрү өҕүтэн ылар кыах суоҕа өйдөнөр. Ол оннугар кинилэри атыннык туһаныахха сөп буоллаҕа.
Алтынньы 23-24 күннэригэр буолбут “Арассыыйа—Африка” саммитыгар Африка 54 судаарыстыбата ыҥырыллыбыта.
Уопсайынан, 90-с сыллартан саҕалаан Арассыыйа уруку ССРС саҕаттан ордон хаалбыт 140 млрд дуоллар ылыахтаах иэһин бырастыы гынан соппута.
