Баан моҥкуруут барар түгэнигэр эбэтэр дьиэни өлүүлэһэн тутууга харчыларын сүтэрбит дьоҥҥо былаас сыһыана араас буолар. Быраактыка көрдөрөрүнэн бастакы ыйыллыбыт эмсэҕэлээччилэргэ улахан болҕомто ууруллубат. Аанньа ахтыбат курдук сыһыан үөскүүр. Кыра да, улахан да биисинэстээх урбаанньыттар лиссиэнсийэлээх судаарыстыбаннай баан килийиэннэрэ буолан, Национальнай баан бигэргэппит бааныгар харчыларын угаллар.
Билигин ордук өлүүлэһэн тутууга албыннаппыт дьоҥҥо көмөлөһө сатыыллар. Оттон экэниэмикэ биир сүрүн араҥатын ылар урбаанньыттарга тоҕо наадыйбаттарый? Бу күннэргэ “Таатта” баантан эмсэҕэлээбит дьон Ил Түмэн дьокутаатын, “Ситим” медиа-бөлөх генеральнай дириэктэрин Мария Христофорованы кытта көрүстүлэр.
Мустубут дьон баан моҥкуруукка барыаҕыттан номнуо биир сыл ааспытын бэлиэтииллэр. Бырабыыталыстыба өттүттэн тылынан эрэ көмө оҥоһулларын, холуобунай дьыала харан турарын туһунан эттилэр. Урбаанньыттар кирэдьиит биэрээччилэр “хара испииһэктэригэр” киирбиттэр. Ордук чааһынай биисинэстээхтэр улахан охсууну ылбыттар. Ол курдук, үгүстэр бэйэлэрин моҥкуруутунан биллэрбиттэр. Дьон үлэтэ суох хаалбыттар.
Маннык холобур олус элбэх. Олортон “Хоту-Бакт” диэн научнай оҥорон таһаарар киин дириэктэрэ Михаил Неустроев маннык этэр: “Дьаһалга бэлиэтэммити харчыбыт суох буолан оҥорор кыахпыт суох. Ол иһин, сотору сабылларбыт да буолуо. Оччоҕо бу вакцина оҥоһуллубат буолар. Бастакынан өрөспүүбүлүкэ ночоотурар. Биһиги тыа хаһаайыстыбатын министиэристибэтигэр тахса сылдьыбыппыт. Баһылык кэлэ сылдьыахтаах. Билигин оҥорбут үлэлэрбин Казахстаҥҥа ыытан эрэбин. Инньэ гынан, аны Казахстантан атыылаһар буолуохпут. Уонна хайдах гыныахпытый?”.
Бу тэрилтэ дойду үрдүнэн соҕотох. 2013 сылтан сылгылар сыстыганнаах ыарыыларын утары вакцина оҥоруутунан дьарыктанар. “Таатта” бааҥҥа 1 мөл солк сүтэрбиттэр. Бу үбүнэн өрөмүөн ыытаары былааннаммыттар. Билигин аны Россельхознадзортан сэрэтии ылбыттар.
Мустубут дьон бары улахан сууманы сүтэрбиттэр. Хас биирдиилэрэ үптэрин ыла охсоору ыксыыллар. “Биһиги харчыбытын төнүннэриҥ! Онтон элбэххэ эрэммэппит даҕаны”, – диэн этэллэр.
Түмүккэ “Таатта” баантан эмсэҕэлээбиттэр реестрдарын тэрийэргэ уонна бары инстанцияларга тахсыахха наадатын эттилэр. Онтон көстөн иһиэ буоллаҕа...
Виктория СТАСЬ, Yakutia24/Якутия24
