Ньурбатааҕы техническэй оҕо дьоҕурун сайыннарар киинигэр Бүтүн Арассыыйатааҕы уопсастыбаннай-судаарыстыбаннай ыччат-оҕо тэрилтэтин күннэригэр анаан Ньурба куоратын уонна Ньурба куустатын оҕо түмсүүлэрин сүлүөтэ буолан ааста. Тэрээһини «Ньурба эрэлэ» оҕо түмсүүтэ көҕүлээтэ. Куорат дьаһалтата, үөрэҕирии салаата, бэтэрээннэр, актыбыыс, лиидэр оҕолор, педагог-тэрийээччилэр кыттыыны ыллылар.
Арассыыйа бэрэсидьиэнэ Владимир Путин Ыйааҕынан 2015 сыллаахха, алтынньы 29 күнүттэн Бүтүн Арассыыйатааҕы уопсастыбаннай-судаарыстыбаннай ыччат-оҕо тэрилтэтэ (Российское движение школьников) тэриллибитэ. РДШ Саха сиринээҕи салаатын бэрэссэдээтэлинэн Ил Түмэн дьокутаата Оксана Токмакова, координатордарынан Нюргуяна Макарова, соторутааҕыта Ньурба улууһугар РДШ муниципальнай сэбиэтэ тэриллэн бэрэссэдээтэлинэн Семен Яковлев, координатордарынан «Ньурба эрэлэ» оҕо түмсүүтүн салайааччыта Валентина Давыдова, педагог-тэрийээччи Глафира Иванова талыллан үлэлииллэр.
РДШ сыала-соруга: Арассыыйа оҕолорун кытары сайдыыга-үүнүүгэ тэҥҥэ хардыылаан араас куонкурстарга, бырайыактарга, граннарга кыттыы буолар. 2017 сыллаахха, алтынньы 29 күнүгэр Ньурба 2 №-дээх оскуолатын «Егоровцы» оҕо түмсүүтэ регистрацияланан, РДШ түөрт хайысхатынан үлэлиир. РСФСР норуот үөрэҕириитин туйгуна, уопуттаах педагог Петр Перфильевкэ анаан «Музейное дело» эссе суруйаннар, Бүтүн Арассыыйатааҕы куонкуруска кыттаннар бастакы миэстэни ылары ситиспиттэр.
Ньурба 3№-дээх алын сүһүөх оскуолатын үөрэнээччилэрин Бүтүн Арассыыйатааҕы уопсастыбаннай-судаарыстыбаннай ыччат-оҕо тэрилтэтигэр киллэрии үөрүүлээх түгэнэ буолла.
Ньурба куорат баһылыга Александр Иванов, улуустааҕы үөрэҕирии управлениетын салайааччытын солбуйааччыта Данил Федоров, Ньурба оройуонунааҕы ыччат уонна спорт бэлиитикэтин сүрүннүүр исписэлииһэ Прокопий Чымыров, Ньурбатааҕы техническэй оҕо дьоҕурун сайыннарар киин салайааччыта Альбина Ермолаева, Ньурба оройуонун КПРФ баартыйаттан Татьяна Кардашевская, Ирина Софронова Ньурба улууһунааҕы РДШ координатора Валентина Давыдова, аҕам саастаах бэтэрээннэр саҥа Арассыыйа оҕо тэрилтэтигэр киирбит кырачааннары эҕэрдэлээтилэр, ситиһиилээх ыччакка махтал суруктары туттардылар.
«Ты права, и это будет» РДШ флешмоб музыкатынан тэрээһин бастакы чааһа түмүктэннэ.
Күн иккис аҥарыгар Ньурба оскуолаларын оҕо тэрилтэлэрин лиидэрдэрин сэбиэттэриттэн Ньурба оройонун баһылыгын иһинэн «Ньурба эрэлэ 2019» бэрэссэдээтэлин талыы быыбара ыытылынна. Антоновка орто оскуолатын 10 кылааһын үөрэнээччитэ, «Үрүҥ түмэн», Таня Алексеева, Ньурба 2 №-дээх оскуолатын 10 кылаас, «Егоровцы», Настя Аммосова, Убайаан орто оскуолатын 8-кылааһын үөрэнээччитэ «Дружба» Марина Иванова, Ньурбатааҕы техническэй лицей 10 кылааһын, «Компас» оҕо тэрилтэлэриттэн быыбарга кытыннылар.
Үгүс элбэх куолаһынан баһыйан, Настя Аммосова, Ньурба 2 №дээх оскуолатын 10 кылааһын үөрэнээччитэ кыайыылааҕынан буолла. Саҥа талыллыбыт бэрэссэдээтэл оҕо тэрилтэтигэр күүскэ үлэлэһиэм диэн андаҕар эттэ. Бу күнү оҕолор Доҕордоһуу биэчэринэн түмүктээтилэр.
Антонина СЕМЕНОВА.
