Томпо улууһун Мэҥэ Алдан агро-оскуолатыгар үгэс курдук сааскы ыһыы үлэтигэр бэлэмнэнэллэр. Кыһыҥҥы тэпилииссэҕэ оҕурсуну олордубуттара номнуо ырааппыт. Өскөтүн былырыын бастакы үүнүүнү ыам ыйын 1 күнүгэр хомуйбут буоллахтарына, быйыл муус устарга быһар былааннаахтар. Оскуола учаастагар “Аргыс” тыа хаһаайыстыбатын кэпэрэтиибин үлэһиттэрэ үлэлии-хамсыы сылдьаллар. Арассаадаларга торфалаах ноһуом иһиттэрин оҥоро сылдьаллар. Ол эбэтэр, торфалаах биэдэрэ үс гыммыт бииригэр икки биэдэрэ ноһуому булкуйаллар.
Барытын илиилэринэн оҥороллор. Валерий Федоров этэринэн, билигин 4 киһи үлэлиир: “Үлэһиттэрбит үүнээйини кытта үлэлээбит дьон буолан хайдах-туох буолуохтааҕын бэркэ диэн билэллэр. Былаан быһыытынан, хаппыыстаны 5 гектар сиргэ олордуохтаахтар. 1 гектардаах сиргэ 30 тыһ. устуука хаппыыста арассаадата наада буоллаҕына, уопсайа барыта холбоон 150 тыһ. арассаада олордуллуохтаах. Күҥҥэ 5 тыһ. арассааданы олордоллор. Маны таһынан атыыга эмиэ хааллараллар”.
Кэпэрэтиип салайааччыта Татьяна Ордахова кэпсииринэн, быйылгы дьылга хаппыыстаттан ураты эбии 5 гектардаах сиргэ хортуоппуйу, сүбүөкүлэни уонна моркуобу олордор былааннаахтар эбит. Тэпилииссэ 1 тыһ. квадраттаах миэтэрэтигэр биэрэс, кабачок, помидор, оҕурсу уонна бахча култуураларын олордуохтаахтар. 57 гектарга туорахтаах үүнээйи ыһыллыахтах. Сүөһү сиир аһылыгын тупсарарга үлэлиир былааннаахтар.
Хас саас ахсын кэпэрэтиип нэһилиэнньэҕэ сибэкки уонна оҕуруот аһын арассаадатын атыылыыллар. Мэҥэ Алдаҥҥа эрэ буолбакка, улуус киинигэр, ыаллыы сытар Кириэс Халдьаайыга хамаҕатык атыылаһаллар.
Оскуолаҕа быйыл үһүс төгүлүн “Дарбасов ааҕыылара” буолаары турар. Сүрүн тэрийээччи – профессор, экэниэмикэ билимин доктора Василий Дарбасов үбүлүөйдээх 75 сааһын туолуохтаах. Урукку сылларга эрэгийиэн таһымнаах ыытыллыбыта – Мэҥэ Хаҥалас, Чурапчы уонна Бүлүү улуустарыттан кэлэн кыттыбыттара. Оттон быйыл бу тэрээһин бүтүн өрөспүүбүлүкэ үрдүнэн ыытыллыаҕа. Сүөһүнү иитиигэ, үүнээйини үүннэриигэ, маны сэргэ тыа сирин сайыннарыыга сыһыаннаах 5-6 сиэксийэнэн үлэлиэхтэрэ. Үгүс болҕомтону ылбыт “Агрокомпетенция” күрэҕэ тыҥааһыннаахтык барыаҕа.
Евдокия Неустроева.
