Кириһиэнньэ ордук православнай итэҕэллээх куораттарга сүдү тэрээһининэн буолар.
Кэлэр өрөбүллэргэ бу тэрээһиҥҥэ туһаайан алмаастаах куорат бэлэмнэнэр. Анньыыттан-хараттан сибэтии гыныллыбыт ууга ыраастаныан баҕалаах, христианскай туомҥа кыттарга дураһыйааччы үгүс. Кириһиэнньэ иорданын, ол эбэтэр Сибэтиэй Троица хыраамын баачыкатынан сибэтии гыныллыбыт сөтүөлүүр купелы куорат анныгар, Иирэлээх үрэҕэр оҥоро сылдьаллар. Былырыыҥҥа диэри Кириһиэнньэ сөтүөтэ Мииринэйтэн уон биэс биэрэстэ тэйиччи сытар Чуоналыыр күөлүгэр буолара. Хас да оптуобус сибэтии гыныллыбыт купельга сөтүөлүү Чуоналыырга айанныыллара.
Быйыл Кириһиэнньэ сөтүөтүн Иирэлээх үрэҕэр ыытыыны куорат былаастара иилээтилэр-саҕалаатылар. Саҥа иордань Мииринэй куорат кииниттэн аҕыйах биэрэстэлээх сиргэ оҥоһуллар. Үрэх уутун туругун тургуттулар, ханна иордань турар сирин уопсай сүбэнэн быһаардылар. Сөтүөлээһин кэмигэр эмчиттэр, ЫБМК дьyһуурунайдыахтара.
Станислав Алексеев, Мииринэй куората.
