Аны икки сылынан Светлэй бөһүөлэгиттэн Сүлдьүкээр диэки айан суолун оҥорбуттара уон сыла буолуоҕа.
Бу суолу олус да уһуннук, сындалҕаннаахтык туттулар. Баара-суоҕа отут биэрэстэлээх сири кутан, дэхсилээн, оҥорон бүтэһиктээхтик түмүктүү иликтэр. Суол суох буоллаҕына сайдыы эмиэ бытаарар. Аны оптоволокно Интэриниэтэ бу дойдуга эмиэ мэлигир. Мобильнай 2 “G” Интэриниэтэ эрэ баар.
Биллэн турар, маннык Интэриниэттээх туох да күттүөннээх дьыала ситиһиллибэт. Оройуон дьаһалтата “Ростелеком” АХ кытары биир сүбэ булан, 2021 сылга оптоволокно хаабылын Сүлдьүкээргэ диэри тиэрдиэхпит диэн эрэннэрэллэр. Аны биир сытыы боппуруос – күүстээх уот суоҕа. Уот уруккутун курдук сотору-сотору барар. Бу боппуруос быһаарылла илик. Санатан эттэххэ, сүрүннээн эбэҥкилэр олорор нэһилиэктэригэр 300-чэ киһи олорор. Сүүрбэ сыл устата Сүлдьүкээр сэлиэнньэтин аҥаара эрэ хаалла.
Станислав Алексеев, Мииринэй куората.
