Бу сыл балаҕан ыйын 1 күнүттэн маҥнайгы сүһүөх оҕолоро босхо итии аһылыгынан хааччыллыахтара. Бу туһунан СӨ бырабыыталыстыбатын пресс-сулууспата иһитиннэрэр.
РФ үөрэх министиэристибэтэ эрэгийиэннэргэ 1-4 кылаас оҕолоро босхо итии аһылыгынан хааччыллалларыгар үбү тыырар. Саха сирэ быһа холоон 391 мөл солк ылыахтаах. Ол туһунан брифинг кэмигэр СӨ үөрэх уонна билим миниистирэ Владимир Егоров иһитиннэрдэ. Оттон өрөспүүбүлүкэ бүддьүөтүттэн 109 мөл солк көрүллэрэ былааннанар.
Миниистир этэринэн, өрөспүүбүлүкэ үрдүнэн бу сыл балаҕан ыйын 1 күнүттэн маҥнайгы сүһүөх 61 тыһ үөрэнээччитэ итии аһылыгынан хааччыллыахтаах.
“Биһиги муниципальнай оройуоннары кытта үлэ ыыттыбыт. Кинилэр бары саҥа үөрэх дьылыттан оҕолору итии аһылыгынан хааччыйарга бэлэмнэрин биллэрдилэр. Оттон ас хаачыстыбатын туһунан этэр буоллахха, көрүллэр үбүлээһин хаачыстыбалаах, үчүгэй бородууксуйаны атыылаһарга кыах биэрэр”, – диэн миниистир этэр.
Оскуолалар итии аһылыгы бэйэлэрэ астыылларын эбэтэр аутсорсинг усулуобуйатынан үлэһэллэрин бэйэлэрэ талаллар.
