Бу туһунан СӨ Доруобуйа харыстабылын миниистирэ Елена Борисова суруналыыстарга кэпсээтэ.
Бу иннинэ 5 киһи Кытайга үөскээбит коронавирус инфекциятыгар уорбаланан киирбиттэрэ, анаалыстарын түмүгэ “коронавирус буолбатах” диэн буолбут. Анаалыстары Новосибирскай куорат “Вектор” билим киинигэр оҥотторбуттар.
Елена Борисова этэринэн, коронавируһу утары бохсууга уонна булууга Саха сирин эмтиир тэрилтэлэрэ күүстээх бэлэмнэниини ааспыттар, стационардары бэлэмнээбиттэр, Кытайтан уонна Кытай аттынааҕы эрэгийиэннэртэн кэлэр поеһы, сөмөлүөтү күүстээхтик бэрэбиэркэлииллэр. Эбии 8 тыҥа аппараатын атыыласпыттар, аэропортарга тепловизордары туруорбуттар. Онон барыта хонтуруолга сылдьар диэн буолла.
Елена Борисова Саха сирин олохтоохторун бу боппуруоска ыгылыйбакка, наҕыллык сыһыаннаһалларыгар ыҥырда. Гигиенаны тутуһарга, элбэх киһи тоҕуоруһар сирдэригэр быгыалаабакка буолалларыгар уо.д.а. сэрэҕи тутуһалларыгар сүбэлиир. Кини сорох СМИлэргэ уонна социальнай ситимнэргэ күүркэтиилээх, сымыйа дойҕохтор тарҕаналларын эттэ. Онон Роспотребнадзор, министиэристибэ эрэ официальнай иһитиннэриилэрин итэҕэйэр буолуҥ.
