Киин улуустарга элбэх кыбартыыралаах олорор дьиэлэри дезинфекциялааһыҥҥа анаан 2 тонна кэриҥэ гипохлорит натрий суурадаһынын биэриэхтэрэ. Бу туһунан СӨ ДьУоХХ уонна энергетикаҕа министиэристибэтэ биллэрэр.
5 бырыһыаннаах дезинфекциялыыр суурадаһыны улуустарга буор-босхо биэриэхтэрэ. Ити суурадаһынынан салайар хампаанньалар уонна ТСЖлар элбэх кыбартыыралаах дьиэ подъезтарын ыраастыахтара.
Мэҥэ Хаҥалас, Нам, Таатта, Уус Алдан, Хаҥалас уонна Чурапчы улуустара 200 л концентраты номнуо ылбыттар. Сотору кэминэн гипохлорит натрий Амма, Горнай уонна Уус Майда улуустарыгар тиэрдиллиэҕэ. Бу иннинэ 6 тоннаны Дьокуускай куорат салайар хампаанньаларыгар биэрбиттэрэ.
Өскөтүн салайар хампаанньалар эбэтэр ТСЖ эһиги олорор элбэх кыбартыыралаах дьиэҕитигэр дезинфекцияны ыыппатах буоллаҕына, олорор сиргитинэн ЕДДС эбэтэр УГСЖН эрийэн биллэриҥ. Дьокуускайга ЕДДС төл: 44-42-29, 44-42-51.
