Муус устар 6 күнүгэр, сарсыарда 11 ч. Айсен Сергеевич үгэс буолбут брифинигэр коронавирус тула балаһыанньаны билиһиннэрдэ.
— Муус устар 6 күнүн сарсыардатыгар Саха сиригэр коронавирус ыстатыыстыката уларыйбата: 15 биллибит ыарыы баар, 6 киһи үтүөрэн тахсыбыт. Онон билигин 9 киһи эмтэнэр. Өрөбүллэргэ Нидерландыттан кэлбит дьахтар анаалыһа барыллаан “положительнай” диэн биллэрбитэ. Ол анаалыс бүгүн Новосибирскайга барда, сарсын киэһэ түмүгэ чопчу биллиэҕэ. Бу дьахтар аэропортан кэлээт, дьиэтигэр соҕотоҕун сыппыт, кимниин да алтыспатах. Кини аттыгар сылдьыбыт дьону булан анаалыстарын ылбыттар. Дьон бэйэтэ өйдөөн-төйдөөн, онно-манна быкпакка, дьиэҕэ сыттаҕына ыарыы тарҕаныытын тохтотор диэн өссө төгүл тоһоҕолоон этиэххэ наада.
Муус устар 1 күнүнттэн ыла, тас дойдуттан кэлбиттэри барыларын күһэлэҥинэн обсерваторга угабыт. Оттон атын эрэгийиэннэртэн кэлбиттэр икки нэдиэлэ устата дьиэҕэ сытыахтаахтар.
Бүгүҥҥүттэн ыла өрөспүүбүлүкэ оскуолалара дистанционнай үөрэххэ көстүлэр. Ол эрээри, ыраах сытар, ордук хоту улуустарга, уонна Интэриниэтэ мөлтөх, суох нэһилиэктэргэ үөрэх атын ньыманнан барар (ити быһа холоон уон бырыһыан үөрэнээччигэ сыһыаннаах). Ол курдук, кинилэр кылааска 12 ахсааҥҥа дылы мустан үөрэниэхтэрин сөп. Оттон сорохторго учууталлар сорудахтарын флешкаҕа эҥин устан аҕалаллар. Маныаха үөрэх министиэристибэтэ хонтуруолу ыытар, кэтээн көрөр. Дистанционнай үөрэх биллэн турар толору хаачыстыбаны биэрбэт. Ол эрээри, баар балаһыанньаны өйдөөн, итинник дьаһанныбыт.
МФЦ бүгүҥҥэттэн үлэлиир. Ол эрээри, эрдэттэн суруттарбыт эрэ дьону көрөр-истэр.
Дойдуга балаһыанньа билигин да уустук. Эрэгийиэннэргэ ыарыһах ахсаана улаата турар. Миигиттэн олус элбэх киһи “тоҕо аэропорт сабыллыбатый?” диэн ыйытар. Ханнык да эрэгийиэҥҥэ аэропорт сабылла илик. Арай, сорох авиахампаанньалар үлэлэрин тохтоппуттарыттан сылтаан, сөмөлүөт көтүүтэ кыччаан, сорох аэропортар толору күүстэригэр үлэлээбэттэр. Холобур, “Победа” авиахампаанньа үлэтин толору тохтотто.
