Ил Дархан көҕүлээһининэн, өрөспүүбүлүкэ дойду эрэгийиэннэриттэн биир бастакынан саҥа эспресс-тестэри ылбыта. АЛРОСА муус устар 10 күнүгэр Дьокуускай уонна Мииринэй лабораторияларыгар 7 тыһ. кэриҥэ “Изотерм SARS-CoV-2PHK-скрин” диэн саҥа Covid-19 ыарыыны булар тест систиэмэтин бэлэхтээтэ. Бу туһунан хампаанньа пресс-сулууспатын үлэһитэ Яна Байгожаева иһитиннэрэр.
АЛРОСА Мэдэссиинэ киинин дириэктэрэ Юлия Кулакова иһитиннэрбитинэн, бэлэхтэммит тест Арассыыйаҕа оҥоһуллубут, тест ыытыллыыта ПЦР (полимеразная цепная реакция) диагностикаҕа олоҕурбут. Инньэ гынан, ПЦР ыстандаартарын кытары үлэлэһэр лабораторияларга эбии тэрили туруорар эҥин наадата суох буолан табыгастаах. Онон биһиги медиктэрбит миэстэтигэр коронавирус инфекциятын түргэнник анаалыстаан булар кыахтаннылар. Аны туран, билигин атыыланар ПЦР ньыматынан оҥоһуллар тестэр үксүн ыарыы РНКтын эрэ быһаарар эбит буоллахтарына, АЛРОСА ылан биэрбит тестэрэ саҥа ньымаҕа олоҕуран, ДНКны кытары быһаччы үлэлэһэр. Инньэ гынан, анаалыс судургутук оҥоһуллар. Анаалыс матырыйаалын анал суурадаһыҥҥа булкуйаллар уонна планшекка уган реакция булкааһыгар уган чинчийэллэр. Исписэлиистэр этэллэринэн, маннык тест үлэ хаамыытын үс төгүл (!) түргэтитэр, пациеннар түмүгү өр кэтэспэттэр уонна сүрүнэ – анаалыс олох сыыспатын тэҥэ. Пациент номнуо биир чааһынан түмүгү илиитигэр тутар. Ити биоматырыйаалы бэлэмнээһин — 35, оттон чинчийии — 25 мүн. ыларын аахсан туран. Атыыга баар тестертэн сүрүн уратыта диэн, бу тест наборун +2-+8 кыраадыска диэри харайыахха сөп, оттон үгүс тест булгуччу -20-70 кыраадыһы эрэйэр. Онон эмиэ табыгастаах.
Билиҥҥитэ саҥа коронавирус ураты эми да, вакцинаны да була иликтэр. Барыта этэҥҥэ буоллаҕына, аны 18-24 ыйынан биирдэ бастакы вакцина айыллыан сөп диэн сылыктааһыны оҥороллор. Онон, билигин бу ыарыыны бохсорго биир сүрүн ньыма – эрэллээх экспресс-тестэри туһаныы буолар. Исписэлиистэр тестэри туһаныы ыарыһахтары түргэнник булууга уонна инфекция тарҕаныытын тутарга улахан көмө буоларын тоһоҕолоон бэлиэтииллэр.
АЛРОСА Саха сиригэр коронавируһу кытары бохсууга 200 мөл. солк. тахса көмөнү оҥордо. Бу үп мэдэссиинэ тэриллэрин: хааҥҥа кислороду киллэрэр, тыҥаны солбуйар анал аппарааттары, мааскалары, бэрчээккэлэри, эми-тому уо.д.а. атыылаһарга туһаныллар.
Ааспыт бээтиниссэҕэ хампаанньа маннык экспресс-тестэри Дьокуускай куоракка баар Өрөспүүбүлүкэтээҕи 3-с №-дээх клиническэй балыыһа лабораториятыгар биэрдэ.
