Өрөспүүбүлүкэтээҕи волонтердар куорпустарыгар биир күн иһигэр 42 волонтер эбиллибит. Онон өрөспүүбүлүкэ үрдүнэн 2292 волонтер үлэлиир. Бу туһунан ulus.media саайтка волонтердар куорпустарын бэрэссэдээтэлэ Александр Сусое иһитиннэрэр.
Кини этэринэн, муус устар 13 күнүгэр бырабыыталыстыба автобазата биэс массыынаны биэрбит. Ону таһынан, сорох волонтердар бэйэлэрин массыыналарынан сылдьаллар. Ол курдук өрөспүүбүлүкэ үрдүнэн 263 массыына үлэлиир. Бу оройуоннар дьаһалталарын уонна волонтердар бэйэлэрин массыыналара буолар.
Волонтердар www.мывместе2020.рф саайтка бэлиэтэнэллэр. Сайаапкалар +7(800)200-34-11, +7(800)100-14-03, +7(4112)35-10-46 киирэ тураллар.
Муус устар 13 күнүгэр “Волонтеры медики” бүтүн Арассыыйатааҕы уопсастыбаннай хамсааһынтан, 2880 устуука 50 миллиграмнаах гель, 16 000 паара бэрчээккэ, 996 устуука 200 миллиграмнаах антисептикт (аэрозоль) туппуттар. Сороҕун Алданнааҕы волонтердар куорпустарыгар ыыппыттар.
“СӨ “Инфокоммуникационнай технологияларын өрөспүүбүлүкэтээҕи киинэ” 3 ноутбугу, 2 моноблогу уонна оператордар суһал көмөнү оҥороллоругар 5 IP төлөпүөнү биэрдэ. Бэҕэһээҥҥи көрдөрүүнэн оройуоҥҥа 65 волонтер үлэлиир. Алдан куоракка 39, Нижний Куранахха — 10, Томмокко — 8, Хатыстыырга — 8. Алдаҥҥа массыыналаах волонтердар ахсаана 20, биир массыынаны дьаһалта биэрбит. Волонтердар инструктаһы бардылар, мааска, бэрчээккэ ыллылар. 39 киһи үөрэнэн бейджилары ыллылар. Массыыналаах волонтердар куорат иһигэр холкутук сылдьалларыгар боруоппус, сорохтор айанныыр билиэттэри ыллылар. Бу күннэргэ волонтердар ахсаана өссө элбиэҕэ”, — диэн Александр Сысоев кэпсиир.
