Дойду бэрэсидьиэнэ Владимир Путин кулун тутарга нэһилиэнньэҕэ көрүллэр социальнай төлөбүрдэр уонна чэпчэтиилэр сыл аҥаарын устата тута уһатыллыахтара диэн эппитэ. Инньэ гынан, Саха сирин орто анал үөрэҕин кыһаларын устудьуоннара социальнай төлөбүрдэрэ уһатыллан, хаттаан бигэргэтиитэ суох тута ылар буолуохтара.
Онуоха туһааннаах бирикээскэ СӨ Үөрэҕин миниистирэ Владимир Егоров илиитин баттаата.
“Өрөспүүбүлүкэ колледжтарыгар уонна техникумнарыгар үөрэнэр кыаммат ыал устудьуоннара бу дьыл алтынньы 1 күнүгэр дылы туһаныахтаах, бу иннинэ ыла сылдьыбыт социальнай төлөбүрдэрин – судаарыстыбаннай социальнай истипиэндьийэлэрин, аска көрүллэр харчынан кэмпэнсээссийэни уонна олорор сирдэриттэн үөрэнэр сирдэригэр дылы айаннарын ороскуотун ол бу эбии ыспыраапканнан бигэргэппэккэ эрэ, аптааматынан ылыахтара”, - диэн үөрэх уонна билим эрэгийиэннээҕи министиэристибэтин пресс-сулууспата суруйар.
Оттон бу иннинэ туһамматах, ол эрээри билиҥҥи туругунан ылар кыахтаах устудьуонар электроннай сайабылыанньаларын e-yakutia.ru диэн судаарыстыбаннай уонна муниципальнай өҥөлөр порталларын нөҥүө биэриэхтэрин сөп. Оттон бигэргэтэр докумуоннарын кумааҕыларын коронавирус инфекциятын сэрэтии эрэсиимэ ааспытын кэннэ туттараллар.
