«Sciberia» диэн Саха сирин IT-хампаанньата коронавирус сэбиргэхтэтиитин быһаарар саҥа айбыт бырагырааматын өрөспүүбүлүкэ үс балыыһата тургутан көрүөҕэ. Бу туһунан ТАСС иһитиннэрэр.
Саҥа бырагырааманы айааччылар этэллэринэн, бу саҥа ньыма коронавирустан сэбиргэхтэтиини (пневмония) буларга көмпүүтэр томографиятын снимогын ылан саҥа технология көмөтүнэн судургутук быһаарар кыахтаах. Бу бырагыраама быраастар 95% коронавируһу булалларыгар кыаҕы биэриэхтээх. Саҥа бырагырааманы кытары үлэлэһэр бырайыагы Дьокуускайдааҕы өрөспүүбүлүкэ клиническэй балыыһатыгар, 3-с №-дээх Дьокуускай куораттааҕы балыыһаҕа уонна Хаҥалас улууһун балыыһатыгар үлэлэтиэхтэрэ.
