Сарсын, муус устар 29 күнүгэр Сунтаардааҕы балыыһаҕа сытар коронавирустаах “РНГ” оробуочайдара үһүс анаалыстарын туттарыахтара. Балартан сылтаан харантыыҥҥа барарга күһэллибит Кутана сэлиэнньэтин 17 олохтооҕуттан эмиэ ылыахтара. Кутанаҕа сарсыардааҥҥы туругунан балаһыанньа уларыйбата. Ыалдьыбыт киһи суох.
Биллэрин курдук, Сунтаар улууһугар “РНГ” хампаанньа “ВССМ” ХЭ самалык тэрилтэтин 10 үлэһитэ, “Сovid-19” дьаҥынан ыалдьыбыттара быһаарыллыбыта. Бу дьаҥ сааһыары Москубаттан Мииринэйинэн Кутанаҕа кэлбит баахта оробуочайдарын улахан бөлөҕүттэн сэдиптэммитэ саарбахтаммат. Ыалдьыбыт дьону баахта бөһүөлэгиттэн тута бөртөлүөтүнэн Мииринэйгэ көһөрөр кыах баар этэ да, онно сөбүлэҥ бэриллибэтэх. Бастаан икки киһини, онтон аҕыс “РНГ” оробуочайын Сунтаар балыыһатын инфекционнай салаатыгар киллэрбиттэрэ. Сунтаар балыыһата маннык ыарахан дьаҥы эмтиир тэриэбэлээҕин, аналлаах эмчиттэрдээҕин учуоттаабакка эрэ, бүтүн баахта “этэрээтин” симпиттэриттэн дьиксинэҕин эрэ. Сунтаарга инфекционист, вирусолог, микробиолог, үрдүкү квалификациялаах лаборант курдук идэлэр сэдэхтэр. Саатар, балыыһа стационарын иккис да уочарата бүтэ илик. Ыалдьыбыт уон дьону тыа улууһугар эмтииргэ дьаһайбыттара, олохтоох дьоҥҥо кутталлааҕын билинэр оруннаах. Бу дьон иккис анаалыстарын муус устар 19 күнүгэр биэрбиттэр. Санитарнай-эпидемиологическай ирдэбил чэрчитинэн, уон күнү ааһан баран үһүс анаалыстарын туттарыахтаахтар.
Оттон Кутана сэлиэнньэтин 17 олохтооҕо (баахта оробуочайдара сылдьыбыт маҕаһыыннарын үлэһиттэрэ) эмиэ бу күн анаалыстарын туттараллар. Коронавирустан сылтаан Сунтаар олоҕо дьалхааннанна. Барыы-кэлии хааччахтанна. Сорох нэһилиэктэргэ шлагбаумнар тураллар. Улуус киинигэр киирии хааччахтанна. Сунтаар сэлиэнньэтигэр “Тандем”, бастакы ырыынак сабыллыбыттара. Урбаанньыттар үлэлэрин тохтоттулар. Парикмахерскайдар, кафелар, чайнойдар, дьон мустар сирдэрэ хатанан тураллар. Нэһилиэктэр икки ардыларыгар айан аҕыйаата. Бэл, ойуурга саһаанныы тахсар бобулунна. Кутанаттан баара-суоҕа икки биэрэстэлээх сиргэ, Саһар үрэҕэр баахта бөһүөлэгэр “РНГ” 42 оробуочайа харантыыҥҥа олорор. Кинилэри Сунтаардааҕы ИДЬМ үлэһиттэрэ хонтуруолууллар. Дьэ, мантан антах быһыы-майгы хайдах буолара биллибэт. Оттон, бу дьаҥ куттала сээбэҥниириттэн, олохтоох дьон олус диэн эрэйдэнэр, мэһэйдэтэр.
Станислав Алексеев, Мииринэй куората. Ааптар хаартыскалара.
