Бэҕэһээ, Сунтаардааҕы балыыһа инфекционнай салаатын эмчиттэрэ, Бүлүү өрүһү хивуһунан туораан онтон суһал көмө массыынатынан Кутанаҕа (Сунтаартан 70 биэрэстэ ыраах) тиийэ сырыттылар.
Манна баахта бөһүөлэгэр харантыыҥҥа олорор “РНГ” бэдэрээттээх тэрилтэтин “ВССМ” 42 оробуочайыттан уонна 19 олохтоох дьонтон хоруона вируһугар үһүс анаалыстарын ыллылар. Бу анаалыстар түмүктэрэ ыам ыйын 3 күнүгэр биллиэхтээх. Бүлүү өрүскэ муус халҕаһата бараары турарынан, эмчиттэр күчүмэҕэй сырыылара уустуктардаах. Хайыаҥый, санавиация манна мэлигир, нефтяниктар бөртөлүөт биэрэр санаалара суох. Ону ол диэбэккэ, Сунтаар эмчиттэрэ бэйэлэрин харыстаммакка хорсуннук сылдьаллар. Даҕатан эттэххэ, Сунтаар балыыһатын инфекционнай салаатыгар “РНГ” хампаанньа “ВостоСибспцемонтаж” (Москуба куорат) бэдэрээттээх тэрилтэтин 10 оробуочайа сыталлар. Бүгүҥҥү туругунан, баахта үлэһиттэрэ киҥир-хаҥыр саҥарбыттара, бууннуу сатаабыттара иһиллэ илик. Кинилэри олохтоох эмчиттэр кыһаллан, бүөбэйдээн көрөллөр-истэллэр, эмтииллэр, повардар тото-хана аһаталлар. Саһар үрэҕэр баахта бөһүөлэгэр 42 оробуочай бу ыарыыга ылларыахтарын сөбө сунтаардары долгутар. Сунтаарга бу дьаҥ тастан кэлиититтэн олохтоохтор сүрдээҕин эрэйдэннилэр, мэһэйдэттилэр.
Станислав Алексеев, Мииринэй куората.
