“Коронавирус тула балаһыанньа билигин да уустук: суукка устата 84 саҥа коронавирустаабыт киһи бигэргэннэ, онтон 80 түбэлтэ – Дьокуускайга, оттон 4-дэ улуустарга: Намҥа, Ленскэйгэ, Мииринэйгэ, Нерюнгрига - 1-дии ыарыһах бигэргэннэ”, - диэн Айсен Николаев брифинг кэмигэр эттэ.
“Ордук уустук балаһыанньа киин куораппытыгар баар. Куоракка ыарыы тарҕаныытын коэффициенэ 1,77 тэҥнэстэ. Оттон балаһыанньа намырыыр түгэнигэр бу көрдөрүү 1-гэ тэҥнэһиэхтээх. Дьокуускайтан улуустарга тахсан утуйар түбэлтэлэрэ элбээтэ. Бүтэһик кэмнэргэ хас да маннык түбэлтэни бэлиэтээтибит, дьолго, ыарыһахтары саҥа кэрдииһигэр булаттаатыбыт”, - диэтэ Ил Дархан.
Кини үөрэх дьыла түмүктэнэн эрэринэн болҕомтону күүһүрдүөххэ диэн ыҥырда.
“Бүгүн үөрэх дьыла түмүктэнэр. Онон оҕолор туох да дьарыга суох мээнэ сылдьыбаттарын, уулуссаҕа, уопсастыбаннай миэстэлэргэ дьаарбайбаттарын хонтуруоллуохха наада. Маны таһынан, бэс ыйын 29 күнүгэр бастакы СКЭ буолуоҕа, онон выпускниктары ордук харыстыаҕыҥ. Мин санаабар. Билигин выпускниктар дьиэттэн олох быкпакка, эксээмэннэригэр күүскэ бэлэмнэниэхтэрин наада”, - диэтэ Айсен Сергеевич.
Бэҕэһээ 32 киһи үтүөрэн тахсыбыт: 29 ыарыһах - Дьокуускайга, Мииринэйгэ, Алдаҥҥа, Намҥа - биирдии ыарыһах үтүөрбүт. Суукка устатыгар 2660 тест оҥоһуллубут, обсерватордарга 712 киһи сытар.
Уопсайа өрөспүүбүлүкэҕэ 1529 саҥа коронавирус инфекцията бигэргэннэ. Олортон 626 киһи үтүөрбүт, 7 киһи өлбүт. 14 киһи ыарахан туруктаах сытар: 13 киһи киһи киин куоракка, биир киһи — Мииринэйгэ, биир киһи ИВЛ аппараатыгар холбоммут.
