Бу өрөбүллэргэ киин куораппытыгар уопсастыбаннай тырааныспар сылдьыбат, итиэннэ маҕаһыыннар үлэлэригэр хааччахтааһын биллэриллэр. Бу туһунан Айсен Николаев сарсыардааҥы брифинигэр кэпсээтэ.
“Балаһыанньа син биир ыарахан. Суукка устата 94 саҥа коронавирустаабыт киһи бигэргэннэ: 56 ыарыһах – Дьокуускайга, 22 – Ленскэйгэ, 8 – Мэҥэ Хаҥаласка. Дьокуускайга дьиэ кэргэҥҥэ, алтыһар дьонтон үксүн сутуллаллар. Ленскэйгэ Чайыҥдатааҕы уонна Талакааннааҕы баахта бөһүөлэктэриттэн ыалдьыбыттар. Мэҥэ Хаҥаласка ыарыһахтар алтыспыт дьонун анаалыстаабыттарын кэннэ буллулар. Бу өрөбүллэргэ ыарыы тарҕаныыта уопсай балаһыанньаны быһаарыаҕа. Бээтиниссэҕэ бары тэрилтэлэр эбийиэктэригэр саньытаарынай ыраастаныыны ыытыах тустаахтар. Дьокуускайга бу өрөбүллэргэ улахан дезинфекция ыытыллыаҕа. Субуотаҕа, өрөбүлгэ Дьокуускай куоракка уопсастыбаннай тырааныспар сырыыта тохтуур, бородуукта маҕаһыыннара субуотаҕа эрэ үлэлиэхтэрэ. Оттон атын маҕаһыыннар, эргиэн туочукалара субуотаҕа, баскыһыанньаҕа үлэлээбэттэр, бу күннэргэ олох дьиэҕэ олоруҥ! Өрөбүлгэ кытаатан ханна да тахсыбакка, дьиэҕэ олордохпутуна, бэнидиэнньиккэ ыарыы намтыа дии саныыбын”, – диэтэ Айсен Сергеевич.
