Киир

Киир

Мииринэй инфекционнай балыыһатыгар үс хонуктааҕыта - 16, онтон – 17 киһи хоруона хамсыгар ылларбыта бэлиэтэммитэ. Бэҕэһээ 19 киһиэхэ хоруона хамсыга баар буолбутун инфекционист-быраастар бигэргэтэллэр.

Бу ыарыһахтар “кыһыл ковиднай” салааҕа эмтэнэллэр. Түөрт киһи сэбиргэхтэтэн, ыарахан туруктаах реанимацияҕ күн сырдыгын иһин охсуһар.

Биир икки өттүнэн сэбиргэхтэппит ыарыһах ИВЛ-га холбоммута үһүс хонуга. Үрүҥ халааттааах аанньаллар кини олоҕун иһин охсуһаллар.

ИВЛ – ыарахан эмтиир бэрээдэк. Маннык аппараакка ыарыһах тыҥатын үлэтэ букатын аккаастаары гынар түгэнигэр эрэ тиийэллэр. Ыарыһахха, муннунан эбэтэр хабарҕатынан тыҥатыгар тиийэ туруупка угаллар. Бу – олус ыарыылаах. Онтуҥ эппэрээссийэни ирдиир. Оннук эппэрээссийэ күүстээх наркоз көмөтүнэн эрэ оҥоһуллар. Ыарыһах бэйэтэ төрүт аһыыр кыаҕа суох. Эмиэ туруупканан аһаталлар. Тыыннаах хааллаҕына, туруупка угалларыгар эмсэҕэлээбит хабарҕата(трахеята) өр оһуон наада.

Онон ИВЛ кэнниттэн ыарыһах доруобуйата энчириир гынан баран, бу – тыыннаах хааларыгар соҕотох суол. Билиҥҥи билим итинтэн ордугу толкуйдуу илик.

Госпитальга провизорскай отделениеҕа сытааччы ахсаана уларыйбата – отучча киһи. Билиҥҥитэ госпитальга туох баар эмтиир тэриэбэ барыта баар.

Ол иһигэр иммунологическай лаборатория, ыарыһах сүрэҕин тэбиитин тэтимин көрдөрөр орон монитордара, СИЗ-тэр, дистационнай термометрдар, биирдэ кэтэр мэдиссиинэ көстүүмнэрэ.

Уопсайа Мииринэй оройуонугар 500-чэ киһи – “самоизоляцияҕа”, обсерватордарга – 400-чэ киһи баар.

Кэлэр-барар киһи элбэх сиригэр, эмчиттэрбит өҥөлөрүнэн, өссө тулуһан олоробут.

Станислав Алексеев, Мииринэй куората.

 

Тарҕат:

Санааҕын суруй

Бүтэһик сонуннар