Бүтэһик нэдиэлэҕэ коронавируһунан ыалдьыы өрөспүүбүлүкэҕэ 17% түспүт.
Суукка устатыар Саха сиригэр эбии 94 киһи ыалдьыбыта бигэргэннэ, 64 киһи үтүөрбүт, биир киһи өлбүт. Бу туһунан Роспотребнадзор хотуна Маргарита Игнатьева иһитиннэрдэ.
Дьокуускайга 60 киһи ыалдьыбыт, 19 ыарһах – Ленскэйгэ, 7 – Намҥа, үстүү ыарыһах – Мэҥэ Хаҥаласка, Мииринэйгэ, икки ыарыһах Алдаҥҥа бигэргэммит. Ыалдьыбыт дьону балыыһаҕа симэллэр, алтыспыт дьонун булан изоляцияҕа ыыталлар, бэрэбиэркэлииллэр.
Хамсык кэмигэр уопсайа 2308 ыарыһахтан 1037 киһи үтөрбүт. Ааспыт суукка устатыгар 64 киһи үтүөрбүт, ол иһигэр 50 киһи Дьокуускайга, 6 – Намҥа, 3 – Тааттаҕа, 2 – Мэҥэ Хаҥаласка, биирдии ыарыүа Нерюнгрига, Хаҥаласка, Өймөкөөҥҥө үтүөрэн тахсыбыттар.
Уон киһи бу уостаах ыарыыттан суорума суолламмыт. Бэҕэһээ Дьокуускайга Суһал мэдэссиинэ көмөтүн киинигэр (РБ2) 89 саастаах дьахтар өлбүт. Саастаах дьахтар хроническай ыарыылардаах эбит. Билигин 20 киһи ыарахан туруктаах сытар. 474 киһи ыарыыны туох да биллэр симптома суох, чэпчэкитик аһарынар. Кинилэр тастан эмтэнэллэр.
Суука устатыгар өрөспүүбүлүкэ лабораториялара 3551 коронавирус теһин оҥорбуттар. Обсерватордарга 728 киһи сытар. Хамсык туруоҕуттан, ыарыһахтары кытары алтыспыт 6 тыһ. киһини хонтуруолга ылбыттар, олортон 14 күн буолан баран 3973 киһи ыалдьыбатаҕа бигэргэнэн хонтуруолтан тахсыбыт. Билигин 1959 киһи хонтуруолга сылдьар, олортон обсерватордарга 221 киһи, дьиэтигэр 1735 киһи изоляцияланан олорор. Маны таһынан атын эрэгийиэннэртэн кэлбит 507 өрөспүүбүлүкэ олохтооҕо обсерватордарга сытар.
Маргарита Игнатьева этэринэн, билигин ыарыыны намыратарга саатар биир нэдиэлэ курдук хааччаҕы тутуһан, кытаатан дьиэҕэ хааллан олоруохпутун наада. Оччоҕо эрэ урукку олохпут киэбигэр түһүөхпүтүн сөп. Онон “самоизоляция эрэсиимин” тутуһуҥ, дьону кытары алтыһыыгытын аччатыҥ, уопсастыбаннай миэстэлэргэ мааскалаах. Бэрэчээккилээх сылдьыҥ, маны таһынан тус гигиенаны уонна дьиэни ыраастык тутаргытын умнумаҥ!
Тэрилтэлэр хас сарсыарда ахсын үлэһиттэр туруктарын кыраҕатык кэтээн көрүөхтэрин наада, температуралаах. Тумуу симптомнаах буоллаҕына суһаллык үлэттэн туоратыллыахтаах. Салайар хампаанньалар, эригиэн тэрилтэлэрэ хаачыстыбалаах дезинфекцияны ыытыахтаахтар.
Бэс ыйын 4 күнүнээҕи туругунан, өрөспүүбүлүкэҕэ коронавирус балаһыанньата маннык:
Уопсайа 2308 киһи ыалдьыбыт, 1037 киһи үтүөрбүт, 10 киһи өлбүт.
