Вице-премьер Ольга Балабкина киэһээҥҥи брифинг кэмигэр билигин урукку курдук хоруона хамсыгар үлэлии кэлэр дьон буолбакка, ордук олохтоохтор ортолоругар дьаҥ күүскэ тарҕаммытын тоһоҕолоото. Ол курдук, оҕолор былаһааккаҕа оонньуу сылдьан сысталларын, онтон дьиэ иһигэр тарҕаталларын, үлэ кэлэктиибигэр, бүтүн дьиэ кэргэҥҥэ сутуллаларын эттэ.
-- Хаҥалас улууһугар биир-икки ыарыһаҕы наар биир сиртэн булаллара – оперативнай штаб үчүгэйдик үлэлээбэтин туоһулуур. Миэрэлэри өссө кытаатыннаран, ыарыы көрдүгэнин саба тутарбыт уолдьаста. Нам улууһугар балаһыанньа син өйдөнөр. Салбаҥҥа харантыын салҕанар, онно улуустааҕы киин балыыһа медиктэрин биригээдэтэ үлэлиир. ИДьМ үлэһиттэрэ волонтердары кытары харантыыҥҥа хатанан олорор дьоҥҥо күүс-көмө буолаллар. Нэһилиэк уулуссатыгар волонтердар уонна полициялар эрэ сылдьаллара көҥүллэнэр. Ити – харантыын усулуобуйата. Салбан олохтоохторуттан үтүөрбүт дьон бааллар. Ол эрээри кинилэр харантыынынан сибээстээн дьиэлэригэр төннөр кыахтара суох. Өймөкөөҥҥө биир көмүс хостуур тэрилтэҕэ үлэлиир олохтоох киһи ыалдьан сытар. Нерюнгрига хомойуох иһин ыарыһахтар элбии тураллар, саҥа көрдүгэннэр тахсаллар. Онно алтыспыт дьону булуу күүскэ ыытыллар. Чурапчыга дьиэ кэргэн сутуллан сытар. Кинилэр бары дьиэ кэргэнинэн эмтэнэ сыталлар. Мэҥэ Хаҥаласка Нам улууһугар ыам ыйын 9 күнүгэр курдук, ыалдьыт кэлэн сыһыарбытыттан элбэх дьон ыарыйда. Билигин биһигини Хатас улаханнык дьиксиннэрэр. Онно билигин Студгородогу аахсыбатахха, саамай элбэх ыарыһах баар. Хатаска аймахтардаах, даачалаах дьон бараргытын туттунуҥ. Хатас олохтоохторо тулуйа түһүҥ, онно-манна быгыалаамаҥ.
Билигин 973 киһи толору үтүөрдэ. Ол эрээри, хомойуох иһин, Дьокуускайга ыарахан туруктаах ыарыһах элбии турар, сорохтор ИВЛ аппараатыгар холбонон сыталлар. Мииринэйгэ түөрт ыархан туруктаах ыарыһахтан үскэ дылы намтаата. Куорат поликлиникаларыгар эрдэттэн суруйтаран ИФА анаалыһын туттарыахха сөп. Балыыһаҕа киирэр дьон үгүстэрэ температуралаахтар, ОРВИ симптомнаахтар. Онон маннык симптому буллаххытына, хайаан да Суһал көмөнү ыҥырыҥ.
