Күн бүгүн Мииринэй инфекционнай балыыһатыгар 60-тан тахсан киһи эмтэнэ сытар.
Оройуон үрдүнэн обсерватордарга 500-кэ киһи баар. «Самоизоляция» чэрчитинэн дьиэҕэ олорооччу ахсаана 500-тэн таҕыста. Кинилэр хоруона хамсыгар ыарыылара бигэргэммит дьону кытары алтыспыттара биллибит.
Мииринэй куорат обсерватордарыгар – “Горняк” профилакторийга, МПТИ уопсайыгар уонна наркология балыыһатыгар олорооччулар ахсааннара оройуон өлүүскэтиттэн 90 бырыһыанын ылар. Мииринэйгэ холоотоххо, Удачнайга, Айхалга, билиҥҥитэ балаһыанньа бигэ.
Мииринэй куоратыгар Аммосов, Ленин, Газовиктар, Тиихэнэп уулуссаларыгар уонна Ленинград бэрэспиэгэр баар дьиэлэргэ хоруона хамсыгар ылларбыт дьон бааллара чуолкайданан, 14 күҥҥэ бу аадырыстарга харантыын биллэрилиннэ.
Инфекционистартан уонна Роспотребнадзортан ураты манна ким да киирбэт. Оттон ол дьиэлэргэ олорор дьон таһырдьа быкпаттар. Хаайтарбыт дьон дьиэҕэ сүгүн олорумаары тииһэллэр. Итинтэн биир суолу бэлиэтиэхпин баҕарабын. Мииринэй олохтоохторо, уулуссаҕа да көрдөххө, дьаҥтан-дьаһахтан харыстыыр маасканы ончу кэппэттэр. Бобуллубутун да үрдүнэн, уулуссаларга хастыы эмэ бөлөҕүнэн сылдьаллар. Ыччат, оҕо-аймах – толору.
Бэл, бырабыытылыстыба өттүттэн, Москубаттан бобуу баарын аахсыбакка, Мииринэйгэ биир итэҕэл көрүҥүн дьоно маассабайдык мустан бырааһынньыктаатылар. Ол бырааһынньык кэнниттэн хас да киһи хоруона хамсыгар анаалыстара соччото суоҕунан билиннэ. Мииринэй куоратыгар сити курдук бэрээдэги, уурааҕы, дьаһалы билиммэттэр. Дьэ, кэлин биирдэ барыны барытын хааччахтаан эрэллэр. Ол курдук куорат пааркатыгар, успуорт былаһааккаларыгар, МФЦ-га, Урбаан Киинигэр, кафеларга бобуу бэлиэлэрэ тураллар. Бэс ыйын 6-7 күннэригэр куорат киин өттүн дезинфекциялаатылар. Бэс ыйын 14 күнүгэр куораты тилэри генеральнай дезинфекция ыытыллыахтаах. Бу күн ханнык да маҕаһыын, пицца-шаурма тириэрдиитэ, аптекалар үлэлээбэттэр.
Оттон Мииринэйтэн атын оройуоннарга барааччылар ковиды утары охсуһар оперативнай ыстааптан көҥүл суруктаах буолуохтаахтар. Нэһилиэктэр олохтоохторо маннык ыспараапканы дьаһалтаттан ылаллар.
Гемодиализка турааччылар, онкология ыарыылаахтар уонна суорума суолламмыттаахтар ханнык да туһаайыыннан көҥүлэ суох айанныыллар. Бэс ыйын 14 күнүн кэнниттэн маннык кытаанах хааччах сымныа диэн эрэннэрэллэр.
Станислав Алексеев, Мииринэй куората. МЦРБ саайтыттан хаартыскалар.
