Ил Дархан: Бэс ыйын 15 күнүттэн сорох хааччахтары көтүрэбит

Бэс ыйын 11 күнүн сарсыардатыгар өрөспүүбүлүкэҕэ эпидемиологическэй балаһыанньаны Айсен Николаев брифинг кэмигэр билиһиннэрдэ.

-- Бүтэһик күннэргэ балаһыанньабыт бигэ. Уопсайа хамсык саҕалыаныаҕыттан Саха сиригэр 2822 коронавирустаабыт киһи бигэргэннэ. Ааспыт суукка устатыгар 69 саҥа коронавирустаабыт киһи баара бигэргэннэ: Дьокуускайга – 57, 6 – Мииринэй улууһугар, 3 - Тааттаҕа, 2 - Үөһээ Бүлүүгэ уонна биир киһи - Намҥа.. Бүтэһик күннэргэ үтүөрбүт киһи ахсаана эбиллэ турар, үтүөрээччи ахсаана ыалдьааччытааҕар элбиирэ үөрдэр. Бэҕэһээ 78 киһи үтүөрэн таҕыста: 65 киһи - Дьокуускайга, 6 - Ленскэйгэ, 4 - Намҥа, 2 ыарыһах - Мииринэйгэ уонна Мэҥэҕэ 1 киһи үтүөрдэ. Хомойуох иһин,  Дьокуускайга 65 саастарын ааспыт, хроническэй ыарыылаах икки киһи суорума суолланна, 17 киһи ыарахан туруктаах сытар.  Ыарыы тарҕаныытын коэффициенэ бүтэһик күннэргэ 0,9 буолан турар, бүгүҥҥү туругунан өрөспүүбүлүкэҕэ – 0,8. Кэнники нэдиэлэҕэ ыарыы тарҕаныыта 2 бырыһыан түстэ. Онон бэс ыйын 15 күнүттэн сорох хааччахтары көтүрэр кыахтанныбыт. Онуоха хааччахтары толору көтүрэр туһунан этэр өссө да эрдэ. Саха сирин сүрүн санитарнай бырааһа мин аадырыспар харантыыны устууга бэйэтин этиитин киллэрбитэ, ону бүгүн күн устата көрөн баран быһаарыыны ылыаҕым, туһааннаах ыйаах тахсыаҕа. Өссө төгүл тоһоҕолоон этиэхпин баҕарабын – хамсыгы кыайыахпыт өссө да эрдэ! Сорох улуустарга балаһыанньа кытаанах, холобур, Мииринэйгэ. Дьокуускайга эмиэ балаһыанньа судургу буолбатах. Өскөтүн ыам ыйын ортотугар күҥҥэ 30-40 ыарыһаҕы булар эбит буоллахтарына, билигин 70-тан түспэт.