Дойду үрдүнэн байыаннай сулууспаҕа ыҥырыы хампаанньата муус устар 1 күнүттэн саҕаланна. Сааскы хомуурга 128 тыһ. саллааты ылар былааннаахтар.
Сааскы хомуур саҕаламмытын туһунанЫйааҕы дойду бэрэсидьиэнэ Владимир Путин кулун тутар 30 күнүгэр таһаарда. “Муус устар 1 күнүттэн от ыйын 15 күнүгэр диэри 18 саастарыттан 27 саастарыгар диэри гражданнары байыаннай сулууспаҕа ыҥырарга <…> ахсаана – 128 000 киһи”, - диэн ыйыллар. Ааспыт сылга сааскы хомуурга 14 тыһ. киһинэн элбэх киһи ыҥырыллыбыта (142 тыһ.), оттон күһүҥҥүгэ – 8 тыһ. элбэх (136 тыһ.).
Быйыл хантараагынан сулууспалааччылар ахсааннара элбээн, “срочниктар” ахсааннара аччаабыт. Арассыыйа Сэбилэниилээх күүстэрин Генеральный штабын сүрүн мобилизационнай управлениетын начаалынньыгын быстах кэмҥэ солбуйааччы Евгений Бурдинскай быйыл ааспыт сылга саппааска ыытыллыбыт уонна доруобуйаларынан сыыйыллыбыт 3 тыһ. киһини ылар былааннаахтарын туһунан этэр. Генерал этэринэн, призывниктар доруобуйалара ааспыт сыллардааҕар быдан тупсубут.
Коми, Ненец уонна Ямал-Ненец уокуруктарыттан, итиэннэ Камчатскай, Красноярскай, Пермь кыраайдарыгар, итиэннэ Амыр, Иркутскай, Магадан уонна Сахалин уобаластарын сорох муниципальнай тэриллиилэригэр сааскы хомуур ыытыллыбат. Бу сирдэргэ хомуур сылга биирдэ эрэ ыытыллар. Маныаха, баҕалаахтар атын эрэгийиэҥҥэ учуокка туран сулууспалыахтарын сөп.
