Кэнники алта күҥҥэ, биһиэхэ – Мииринэй куорат олохтоохторугар, мөкү сонуннар кэлитэлээтилэр.
Ол курдук, Мииринэй куоратыгар, ыам ыйын 13 күнүттэн ылата 45 киһи хоруона хамсыгар ыллардылар.
Мииринэй инфекционнай балыыһатыгар икки ковиднай салааҕа уонна провизорскай госпитальга сытааччы ахсаана барыта - 60-ча киһи буолла.Отукка диэри хоруона хамсыга ыарыылаах киһи дьиэлэригэр харантыын усулуобуйатыгар олорон эмтэнэллэр. Ханна да тахсар, урууларын, табаарыстарын ыҥырар кыахтара суох.
Биир үтүө сонуммут – реанимацияҕа ИВЛ-га холбонон сыппыт киһи аппарааттан босхоломмута. Билигин, тыҥатын үлэтин чөлүгэр түһэрэргэ, күүстээх эмтэниини барар.Эмчиттэр харантыыҥҥа сабыллан олорор дьиэлэргэ (Аммосов, Тиихэнэп, Газовиктар уулуссалара, Ленинград бэрэспиэгэ, ПДУ) тиийэн эмтиир үлэлэрэ үксээтэ. Балаһыанньа куоракка эрэсиими холкутаппыттарыттан хаахтыйда. Ааспыт өрөбүллэргэ дьон ыалдьыыта ордук үксээтэ.Роспотребнадзор Мииринэйдээҕи салата бу нэдиэлэ саҥатыгар, хоруона хамсыга көрдүгэннээбит сирдэрин чопчу булаттаата. Бу – икки таҥара дьиэтэ, Советскай уулуссаҕа бэһис нүөмэрдээх почта, бородууктанан эргинэр икки бөдөҥ атыы-эргиэн кииннэрэ. Дьон саамай тоҕуоруһар, сылдьар сирдэрэ. Мин эпидемиология уонна гигиена киинигэр төлүппүөнүнэн эрийэ сылдьыбыппар, почта Советскай уулуссаҕа турар салаатыгар, улахан дезинфекция ыытылынна диэн эппиэттээтэ. Үөһээ ааттаммыт тэрилтэлэр билигин сабыыллан тураллар. Бу иннинэ Мииринэйгэ биэс олорор дьиэ хоруона хамсыгар ыарыһахтардаах уонна кинилэри кытары алтыспыт дьонноох буолан икки нэдиэлэҕэ сабылыннылар диэн суруйбутум. Аны туран, Ковид-19 Айхалга уонна Арыылаахха тиийдэ. Онон баччааҥҥа диэри тулуһан турбут Мииринэй оройуонугар хоруона хамсыга тэнийэр кутталланна. Мииринэй куоратыгар, дьон үксэ харыстанар мааската, бэрчээккитэ суох сылдьаллар. Элбэх ыччат бөлөҕүнэн уулуссалары кэрийэр, дьиэлэр подъезтаргар сыбыытыыллар. Түүннэри сүпсүлгэн улаатар. Дьон дьиэҕэ хаайтарыан баҕарбат.
Ордук куорат уулуссаларыгар, таҥара дьиэтин скверигэр, пааркаҕа, Ботаническай саадка, Ленин буолуоссатыгар дьаарбайа сылдьааччы үгүс. Куорат киинин уулуссаларыгар туруоруллубут араадьыйалартан «бука диэн дьиэҕитигэр олоруҥ» диэн көрдөһүүлэрин кумаардаан да көрбөттөр.Сорох маҕаһыыннарбытыгар илиини соттор антисептик мэлигир. Бэс ыйын 14 күнүгэр, биир да эргиэн тэрилтэтэ үлэлиэ суохтаах, бүттүүн дезинфекция ыытыллар диэн биллэрбиттэрин үрдүнэн фаст-фуд, шаурма атыылыыр лааппылар сарсыардаттан киэһээҥҥэ диэри үлэлээтилэр.
Дьон хоруона хамсыгынан ыалдьа турарыгар, нэһилиэнньэ сорох өттө долгуйбата, дьаалайбата өтө көһүннэ.
“Тумууттан улахана суох ыарыыны күүркэтэллэр”, «Ковид диэн – тымныйыы эрэ» диэн социальнай ситимнэргэ, ватсаапка куолулаабыттара ыраатта.Баҕар ол иһин, дьон Мииринэйгэ холку быһыылаахтар. Мантан антах, Мииринэйгэ ыарыһах аҕыйыа диэн мэктиэлиир кыах суох.
Тоҕо диэтэххэ, дьон быраабыланы, былаастарынан олохтоммут ирдэбили тутуспата бэрт. Ону хонтуруоллааһын мөлтөх. Онон, хоруона хамсыгын утары киирсиһии чэрчитинэн, Мииринэйгэ харантыын да киллэриллиэн сөп.
Станислав Алексеев, Мииринэй куората.
