Усуйаана улууһун борокуратуурата саҥа аармыйаттан кэлбит улуус олохтооҕор Арассыыйа ХК 236 ыст. 1 ч. (саньытаарынай-эпидемиологическэй быраабыланы кэһэн, дьон маассабайдык ыалдьар кутталын тэрийии) тэриллибит холуобунай дьыалатын суут көрнүүтүгэр ыытта.
Борокуратуура быһаарбытынан, уорбаланааччы Хабаровскайтан Дьокуускайга сулууспатын кэннэ көтөн кэлбит. Дьокуускай аэропордугар киниэхэ өрөспүүбүлүкэ кылаабынай саньытаарынай бырааһын солбуйааччыта Дьокуускайга хайаан даҕаны бэйэ изоляциятын барыахтааҕын туһунан сэрэтиини биэрбит уонна анаалыс ылбыттар. Онуоха дембель улахаҥҥа уурбатах уонна икки нэдиэлэлээх изоляциятын тутуспакка, Дьокуускайтан дойдутугар – Депутатскайга көппүт, онно кини коронавируһунан ыалдьыбыта бигэргэммит. Инньэ гынан, дембель бүтүн улуус олохтоохторугар улахан кутталы үөскэппит, маны таһынан кинини кытары бииргэ көппүт билэр киһитин сутуйбут.
Уорбаланааччы буруйун толору билиммит, бырастыы көрдөспүт уонна сутуйбут киһитигэр хоромньуну төлөөбүт.
Инньэ гынан, эмсэҕэлээччи уонна борокуруор сүбэлэһэн баран, уорбаланааччыга тэриллибит холуобунай дьыаланы сабарга, ол оннугар ыстыраабы төлөтөргө быһаарбыттар.
