Өрөспүүбүлүкэ вице-премьерэ Ольга Балабкина бу сарсыарда брифинг кэмигэр хоруона хамсыгын тула балаһыанньаны билиһиннэрдэ.
Кини этэринэн, балаһыанньабыт сол да уустук. Саха сиригэр коронавируһунан сибээстээн күүстээх бэлэм буолуу эрэсиимэ оннунан хаалар.
Ааспыт суукка устатыгар 47 саҥа коронавирустаабыт киһи бигэргэммит: 39 – Дьокуускайга, 4 – Нерюнгри оройуонугар, иккилии ыарыһах Мэҥэ Хаҥаласка уонна Дьааҥы улууһугар.
“Дьааҥы улууһугар билигин дьаһалта уонна мэдэссиинэ тиһигэ ыарыһахтары эмтииргэ уонна кэлбит дьону толору хонтуруоллуурга бэлмнэр. Улууска дезинфекцияны ыытыы күүһүрдүллүбүт, ыарыһахтары кытары алтыспыт дьону булаллар. Мэҥэҕэ Дьокуускайтан кэлбит дьон сутуйбуттар. Нерюнгри оройуонун дьаһалтатыгар мааска эрэсиимин тутуһалларын күүһүрдэллэригэр эттибит”, - диэтэ Ольга Балабкина.
Маны таһынан, Ольга Валерьевна хамсык иннинээҕи нуурал олохпутугар өтөрүнэн төннүбэппитин эттэ.
“Оҕотуттан саҕалаан бөдөҥ тэрилтэ салайааччытыгар тиийэ бука бары санитарнай-эпидемиологическэй нуорманы хайаан да тутуһуохпутун наада. Мааскалаах, бэрэчээкилээх сылдьыахтаахпыт, социальнай дистанцияны тутуһуохтаахпыт, бэйэ-бэйэни кытары чугастык алтыһыыттан өр кэм устата туттуннахпытынан табыллар”, - диэн Балабкина сэрэттэ.
Уопсайа хамсык кэмигэр өрөспүүбүлүкэҕэ 4598 киһи сутуллубут, олортон 3625 киһи — Дьокуускайга (78,8 бырыһыан). Суукка устатыгар 1948 анаалыһы оҥорбуттар. Бэҕэһээ 49 киһи үтүөрбүт.
