Саха сиригэр ааспыт суукка устатыгар 54 киһи коронавируһунан ыарыйда, олортон 45 киһи – Дьокуускайга. Бу туһунан зампред Ольга Балабкина брифинг кэмигэр иһитиннэрдэ.
“Хамсык тула эпидемиологическэй балаһыанньабыт өссө да ыарыхан. Суукка устатыгар 54 саҥа коронавирус түбэлтэтин буллубут, ол иһигэр 45 – Дьокуускайга, 4 – Ленскэй улууһугар. Онно атын сиртэн кэлбит киһиттэн сыстыбыттар. Хаҥаласка эмиэ кэлии дьонтон сутуллубуттар. Уопсайынан, улуустарга кэлии дьонтон сыстыһаллар. Биирдии ыарыһах Алдан уонна Дьааҥы улуустарыгар баар буолла. Дьааҥы улууһугар иккис күнүн Дьокуускайтан тиийбит биригээдэтэ үлэлиир. Биһиэхэ дакылааттаабыттарынан, онно миэстэтигэр сөптөөх үлэ ыытыллар, Баатаҕайгэ кэлбит хас биирдии киһини кэтээн көрөллөр. Алдаҥҥа сэбиргэхтэппит киһи кэлбитин кытары сибээстээх, хайдах оннук буолбутун быһаара сатыыллар да, ыарыһах сабыылаах социальнай тэрилтэҕэ булуллубут буолан кэккэ ыарахаттар бааллар. Бэрэбиэркэ кэмигэр ол интэринээт салайааччытын тохтоттулар, онно үлэ уонна социальнай харалта миниистирин солбуйааччыта тиийдэ”, - диэн Ольга Валерьевна иһитиннэрдэ.
Билигин оперативнай штаб оскуолалар, уһуйааннар, спорт тэрилтэлэрэ, эбии үөрэхтээһин тэрилтэлэрэ салгыы хайдах үлэлииллэрин торумнуур. Вице-премьер эппитинэн, атырдьах ыйын күнүгэр дылы Ил Дархаҥҥа ити туһунан дакылааттыахтаахтар, былааннарын биэриэхтээхтэр. Балабкина оҕолорго тумууну уонна ОРВИны утары күүстээх вакцинация ыытыллыахтааҕын эттэ.
Оперативнай штаб иһитиннэрбитинэн, суукка устатыгар киһи ковидтан суорума суолламмыт. Уопсайа хамсык кэмигэр 4710 киһи сутуллубут, олортон Дьокуускайга 3719 киһи ыалдьыбыт. Ааспыт суукка устатыгар 26 киһи үтүөрбүт.
