Сарсыардааҥҥы брифинг кэмигэр өрөспүүбүлүкэҕэ хоруона хамсыгын тула эпидемиологическэй балаһыанньаны СӨ Доруобуйа харыстабылын миниистирэ Елена Борисова уонна үлэ уонна социальнай сайдыы миниистирэ Елена Волкова билиһиннэрдилэр.
Елена Борисова:
-- Суукка устатыгар 60 киһи коронавирустаата, 5-тии ыарыһах Мииринэй, Нерюнгри оройуоннарыгар, 2 ыарыһах – Хаҥаласка бигэргэннилэр. Дьокуускайга ыарыы намтаабат, бэҕэһээ эбии 31 киһи ыалдьыбыта билиннэ. Алдан улууһугар балаһыанньа эмиэ уустук. Онно 17 киһи сутуллубут. Хомойуох иһин, биир киһи суорума суолланна. Өлбүттээхтэргэ дириҥ кутуҕаммытын тиэрдэбит. Суукка устатыгар 2 тыһ. тахса анаалыһы оҥордубут. Хамсык саҕаланыаҕыттан 250 тыһ. тахса чинчийиини оҥордубут. Билигин дьон социальнай ситимнэринэн “анаалыһы ылбат буолбуттар” диэн айманаллар. Ыам ыйыттан ковид анаалыһын оҥоруу уларытыллыбыта. Бастакы күҥҥэ буолбакка, 8-10 күннэригэр ыла сатыыбыт, тоҕо диэтэххэ, ол ордук чопчу түмүгү биэрэр. ОРВИ симптомнаах дьон тута изоляцияҕа барыахтаахтар уонна олорор сирдэринэн балыыһаҕа биллэриэхтээхтэр. Оттон хоруона бигэ сибикитэ баар буоллаҕына биирдэ анаалыһы ылаллар. Онон “олох анаалыс ылбаттар” диэн айманар оруна суох. Балыыһаҕа эрийдэххитинэ, дистанционнайынан ныьаманнан эбэтэр быраас бэйэтэ кэлэн эми аныахтара.
Елена Волкова:
-- Кыамматар, кырдьаҕастар уонна инбэлииттэр дьиэлэрэ муус устартан ыла сабыылаах эрэсиимҥэ көспүттэрэ. Оннук быһаарыыны биһиги дойдуга биир бастакыннан ылыммыппыт. Кырдьаҕастар “группа риска” киирсэллэр, онон болҕомто ордук кинилэргэ ууруллар. Хомойуох иһин, Томмоттооҕу психо-неврологическэй интернакка ыарыы киирдэ. Билигин миэстэтигэр министиэристибэттэн анал биригээдэ үлэлиир, ыарыы хайдах киирбитин бэрэбиэркэлииллэр, ол кэмигэр салалта тохтотулунна. Онно эбии үлэһиттэри хомуйаллар. Саха сиригэр балаҕан ыйыгар дылы 47 тэрилтэ харантыыҥҥа сабыллан олороллор.
Уопсайа хамсык кэмигэр өрөспүүбүлүкэҕэ 4904 киһи сутуллубут.
