Аҕыйах хонуктааҕыта Арктикаҕа авиацияны сайыннарыы боппуруостарыгар Федерация Сэбиэтин иһинэн үлэлиир Арктика уонна Антарктида Сэбиэтин биидьийэ-кэмпириэнсийэ мунньаҕа буолан ааста. Онно Судаарыстыбаннай мунньах бэрэссэдээтэлин солбуйааччы Виктор Губарев Ил Түмэн тустаах авиацияҕа сыһыаннаах этиилэрин иһитиннэрдэ. Мунньаҕы Арктикаҕа уонна Антарктидаҕа Сэбиэт бэрэссэдээтэлэр Александр Акимов салайан ыытта.
Арктика авиациятын сайыннарыы бүгүҥҥү тирээн турар сытыы кыһалҕалартан биирдэстэрэ буоларын бэлиэтээтилэр. Сенатор Арктика улуустарын олохтоохторо авиация сибээһэ суох олороллоруттан долгуйарын биллэрдэ. Көтүү аҕыйаабытын, авиаинфраструктура эстэн эрэрин, көтөр ааллар быста эргэрбиттэрин, логистикс тиһигэ суох кэриэтэ буолбутун аҕынна. Ил Дархан Айсен Николаев Арктика суоната тырааныспар сырыытыттан ойуччу быстан кэриэтэ олорорун бэлиэтээтэ. Өрөспүүбүлүкэ бүддьүөтүттэн оройуон иһинээҕи 157 маршрукка авиабилиэт 70% субсидиятыгар үп көрүллэрин, кэккэ араҥаҕа чэпчэтиилээх тарыып олохтоммутун эттэ. Ол гынан баран бу кээмэй күн бүгүн бу субсидиялаах тарыыбынан Арктика олохтооҕун баара эрэ 10 % хааччылларын иһитиннэрдэ. Ол курдук, Арктика хайысхатыгар субсиди көрөргө 2,5 млрд солк. наада эбит буоллаҕына, 413 мөл. солк. былааннаммытэ. Онон олохтоох көтүүнү субсидиялыырга федеральнай өйөбүлэ суох биир да эрэгийиэн кыһалҕаны кыайар кыаҕа суоҕун быһаарда, көтөр ааллар эргэрбиттэрин эттэ. Уһук Илин маршруттарыгар олохтоох оҥоһуу ааллар наадаларын бэлиэтээтэ. Федеральнай хааһына тэрилтэлэрин, о.и. “Аэропорты Севера” тэрилтэ үлэтин ырытан көрөрү туруоруста. Виктор Губарев авиахампаанньалар лизиҥҥэ төлөбүрдэригэр 20 % кэмпэнсээссийэни аныыр туһунан толкуйдуурга эттэ. Айсен Николаев авиальянсы тэрийиэххэ диир этиитин өйүүрүн биллэрдэ. Болҕомтолоох буоларга ыҥырда.
