Хоруона хамсыгын утары охсуһар оройуоннааҕы оперативнай штаб “Алмаастаах кыраай” теле-араадьыйахампаанньаҕа биллэрбитинэн, Мииринэйгэ балаһыанньа маннык.
Бэҕэһээҥҥи күн туругунан, ковиднай госпитальга 32 ыарыһах баар эбит. Ыарахан туруктаах биир ыарыһах реанимацияҕа сытар. Бу иннинэ реанимацияҕа сыппыт икки ыарыһах арыый да ама буолбуттар. 44 киһи провизорскай салааҕа ыарыылара тургутуллар. 110 киһи амбулаторнай быһыылаахтык уонна дьиэлэригэр олорон эмтэнэллэр.Соторутааҥҥы диэри хоруона хамсыга Мииринэйтэн 50-ча көс ыраах Удачнай куоратыгар уонна Айхал бөһүөлэгэр суох этэ. Балаһыанньа билигин ол диэки уустугурарга барда. Ол курдук, Удачнайдааҕы балыыһа ковиднай салаатыгар биэс киһи хоруона хамсыгар ыарыыларын диагноһа чопчу туруоруллан эмтэнэллэр.
Ити тугу көрдөрөрүй?
Бу аата, хоруона хамсыга Мииринэй оройуонугар олоҕурар кутталланна. Маны болҕойор булгуччулаах.Хоруона хамсыгар ылларбыт ахсаана оройуон үрдүнэн 200-кэ киһиэхэ чугаһаата. Өссө төһө киһи ыалдьар сибикитэ биллэрбэккэ, кистэнэ сылдьаллара биллибэт. Мииринэйгэ салгын суолунан айаннаан кэлээччилэри аэропуорка анал походнай балааккаҕа Мииринэй балыыһатын инфекционист-эмчиттэрэ уонна Роспотребнадзор салаатын бэрэстэбиитэлэ бэрэбиэркэлиир, тутатына анаалыс ылар, докумуоҥҥа тиһэр эбээһинэстээхтэр. Оттон Усть-Куттан Өлүөнэ өрүһүнэн суол аһаҕас. Суудуна, баарса, катер арааһа сылдьар. Осетрово өрүс пуордуттан адьас чугас Витим бөһүөлэгиттэн пассажирскай теплоход Ленскэй куоратыгар устар. Араас дьон кэлэр-барар.
Онон, хоруона хамсыгын тула балаһыанньа арыый да ама буолуохтааҕар, күннэтэ мөлтөөн иһэр диирбэр эрэ тиийэбин.
Станислав Алексеев, Мииринэй.
