Сунтаар улууһун Илимнииригэр Орел уобалаһын племенной хаһаайыстыбатыттан 120 төбө племенной сүөһүнү аҕаллылар. Бу туһунан ТХМ пресс-сулууспата иһитиннэрэр.
“Сүөһүлэр 18 күн устата анал көлөннөн 10 тыһ. тахса км сири айаннаан этэҥҥэ кэллилэр. Билигин кинилэри отут күннээх харантыыҥҥа уктулар, туруктара үчүгэй”, - диэн суруйаллар.
Сүөһүлэри “Ил-Тосхол” ТХПК аҕалбыттар. Бу хаһаайыстыба 2020 сыл муус устарыттан үлэтин саҕалаабыта. Кэлии сүөһүлэр улууска тыа хаһаайыстыбатын бородууксуйатын оҥорон таһаарыыны улаатыннарарга тирэх буолуохтара.
Улуустааҕа тыа хаһаайыстыбатын управлениетын начаалынньыга Иван Тихонов кэпсииринэн, билигин Илимнииргэ саҥа хотон тутулла турар. Эһиил хаһаайыстыба ТХМ ыытар судаарыстыбаннай бырагырааматыгар кыттыһан саҥа туттар хотоннорун сорох чааһын уйуннараары гынар, маны таһынан племенной сүөһүнү атыылаһыыга уонна ходуһалары сөргүтүүгэ эмиэ киирсэр былааннаах.
Маны таһынан улуус киинигэр саҥа үүт сыаҕа уонна Аллыҥаҕа хотону тутуу уонна быраҕыллыбыт ходуһалары, бааһыналары сөргүтэргэ былаанныыллар.
