Ааспыт суукка устатыгар Саха сиригэр эбии 87 киһи хоруона хамсыгар ылларбыта бигэргэммит.
Киин куораппытыгар ыарыһах ахсыына күн-түүн эбиллэн иһэр - 48 киһи ыарыйда. Алдаҥҥа, Мэҥэ Хаҥаласка - 7-лии киһи ыалдьыбыт, Мииринэйгэ - 6 киһи сутуллубут. Аммаҕа, Өймөкөөҥҥө - 4-түү киһи бигэргэммит. Нам, Нерюнгри, Сунтаар улуустарыгар - 3-түү киһи ыалдьыбыт. Уус Алдаҥҥа икки киһи ыалдьыбыт диэн Суһал штаб иһитиннэрэр. Ыарыһахтары кытары алтыспыт дьон кимнээхтэрэ биллибит, кинилэри изоляцияҕа ыыппыттар. Суука устатыгар Саха сирин лабораториялара 4005 анаалыһы чинчийбиттэр.
Ил Дархан алтынньы 30 күнүгэр дылы хааччахтыыр миэрэлэри уһатта. Инньэ гынан 65 саастарыттан үөһэ саастаах дьон уонна хроническэй ыарыылаахтар дьиэттэн тахсыбаккыт. Маны таһынан, сэтинньи 1 күнүгэр дылы өрөспүүбүлүкэ үрдүнэн эбии үөрэхтээһин тэрилтэлэрэ үлэлээбэттэр. Онтон атына Роспотребнадзор ирдэбилин тутуһуннаран барыта үлэлиир.
