Дьэ, кэмниэ-кэнэҕэс, Кириэстээх таас оскуолалана сатыыр. Тимир-бетон тулааһыннанан, дьоҕус блоктар дьэндэтиллэн, кырыыһатын үксэ бүрүллэн, оскуола дьиэтин холлоҕоһо бүтэн турар. Ол эрэн, билигин да "Профстрой" тэрилтэ ыытар тутуута, силигин ситиэ ыраах.
Элбэх үлэ эрэйиллэр. Бу 120 миэстэлээх оскуоланы Сунтаар улууһа бэйэтин үбүгэр-харчытыгар тутар эбит. Онуоха оруннаах ыйытык үөскүүр.
Тоҕо уһук сытар, эрэйдээх суоллаах-иистээх Сунтаар улууһугар үгүс тутуу оройуон бэйэтин суотугар эрэ дьэндэтиллэрий?
Мин көрөрбүнэн, Дьокуускай тулатынааҕы улуустарга, өрөспүүбүлүкэ бүддьүөтүн уонна пуондаларга алмаастан киирэр үп суотугар таас тутуу бөҕөтө сөҕүмэрдик барда. "Алмаастаах түөлбэ" диэн Дьокуускайы уонна кини тулатынааҕы оройуоннары ааттыахха сөп. Сайдыы таһыма кинилэргэ кырдьык чыҥха атын, быдан ордук. Ол диэки улуустар түгэх дэриэбинэлэргэ тиийэ тупсаҕай, таас оскуолаламмыттара ыраатта.
Оттон Сунтаар улууһугар таас оскуола тарбахха баттанар.
Ону даҕаны биир-икки таас оскуоланы өрөспүүбүлүкэ үбүгэр буолбакка, меценаттар күүстэринэн туппуттара. Мантан киһи дьиксинэр. Элбэх мас оскуола ССРС саҕаттан самналлан тураахтыыллар. Убуорунайдара – таһырдьа. Кириэстээх эргэ оскуолата 1978 сылтан самналлан турар. Хаһан эрэ, ардах кырыыһатынан тэстэрин өйдүүбүн.
Бүлүүчээн оскуолата эмиэ 20-с үйэ тутуута. Эргэ. Наахара, Дьаархан, Куокуну, Илимниир, Устье, Кэмпэндээйи, Туойдаах, Хоро, Маар-Күөл, Сиэйэ, Хадан, Бордоҥ, Тэҥкэ, Сунтаар иккис, үһүс, санаторнай-лесной оскуолалара - барыта мас тутуулар. Иккис оскуола умайыаҕыттан ылата оҕолор кулууп дьиэтигэр үөрэнэ сатыыллар. Тойбохойго Арҕаа оскуола диэн баара өйөбүл суох буолан сабыллыбыта.
Бордоҥ оскуолатын тутууну чыыста нэһилиэк күүһүнэн эрэ ыыппыттара. 2004 сыллаахха үлэҕэ бэрт эрэйинэн киллэрбиттэрэ. Өрөспүүбүлүкэ өттүттэн соххор солкуобай да ороскуоттамматаҕа. Бу тоҕо манныгый?!
Хаһааҥҥа диэри Сунтаар улууһа сиэрэ суох көйгөтүллэр?! Хаһан дьиҥнээх "алмаастаах түөлбэ" улууһа буолар? Хаһан Сунтаар сирин үгүс оҕолоро, киин улуустарга курдук, аныгы усулуобуйалаах, тупсаҕай оскуолаларга дьоллоохтук үөрэнэллэрий?!
Станислав Алексеев. Мииринэй куората. Ааптар фототугар тутулла турар Кириэстээх оскуолата.
