Ааспыт сууккаҕа Саха сиригэр эбии 220 киһи хоруона хамсыгар хаптарбыта бигэргэммит. Ол иһигэр 50 ыарыыны тарҕатааччы булуллубут. Бу туһунан брифинг кэмигэр Ольга Балабкина билиһиннэрдэ.
Ол курдук, Дьокуускайга 126 киһи ыалдьыбыт. 8-тыы ыарыһаҕы Бүлүү уонна Мииринэй улуустарыгар, 6-лыы – Алдан уонна Мэҥэ Хаҥалас, 5 киһи – Нерюнгри улууһугар, 4-түү ыарыһаҕы – Үөһээ Бүлүү, Горнай, Уус Алдан уонна Хаҥалас улуустарыгар булбуттар. Үстүү ыарыһаҕы Анаабыр, Дьааҥы, Кэбээйи, Ленскэй, Ньурба, Өймөкөөн, Өлөөн уонна Сунтаар улуустарыгар бигэргэппиттэр. Маны таһынан, иккилии хоруона хамсыгар хаптарбыт ыарыһаҕы Булуҥ, Муома, Орто Халыма, Томпо уонна Уус Майда улуустарыгар булбуттар.
Хомойуох иһин, ааспыт сууккаҕа 3 киһи хоруона хамсыгыттан суох буолбут. Саха сирин лабораториялара 3450 анаалыһы оҥорбуттар (хамсык саҕаланыаҕыттан 725125 тест).
“Стопкоронавирус” саайт суруйарынан, хоруона хамсыга саҕаланыаҕыттан Саха сиригэр 211 киһи бу ыарыыттан өлбүт. Алтынньы 17-сэтинньи 17 күннэригэр номну 100-тэн тахса киһи өлбүт: 106-тан 211-гэ тиийбит. Бу саайтка сурулларынан, сэтинньи 2 күнүгэр 10 киһи өлбүт диэн. Оттон Суһал ыстаап маннык иһитиннэриини биэрбэтэҕэ. Кинилэр дааннайдарынан, сэтинньи 2 күнүгэр 2 киһи өлбүт диэн этэ. Бэҕэһээ 3 киһи өллө диэбиттэрэ да, СтопКоронавирус саайтка 5 киһи өлбүт диэн киирбит. Маннык араастаһыы хантан кэлбитин биһиги ситэ өйдөөбөтүбүт.
