Саха сиригэр ааспыт суукка устатыгар эбии 217 киһи хоруона хамсыгар хаптарбыта бигэргэммит. Бу туһунан вице-премьер Ольга Балабкина брифинг кэмигэр кэпсээтэ.
“Сэтинньи 27 күнүнээҕи туругунан, өрөспүүбүлүкэҕэ 217 COVID-19 диагнозтаах киһи бигэргэннэ, ол иһигэр ыарыыны тарҕатааччы – 48. Дьокуускайга 116 киһи ыалдьыбыт. Чурапчы уонна Мэҥэ Хаҥалас улуустарыгар ыарыы улаатар, онно дьиэ иһинээҕи көрдүгэннээһин бэлиэтэнэр. Хомойуох иһин, суукка иһигэр 4 киһи хамсыктан күн сириттэн туораата”, - диэтэ Ольга Балабкина.
Чурапчы улууһугар – 7, Мэҥэ Хаҥаласка – 6, Алдаҥҥа, Кэбээйигэ, Нерюнгрига, Сунтаарга уонна Томпоҕо – 5-тии киһи ыалдьыбыт. 22 улууска 1-тэн 4-кэ дылы ыарыһах бигэргэммит. Суукка устатыгар өрөспүүбүлүкэ лабораториялара 4225 анаалыһы оҥорбуттар (хамсык саҕаланыаҕыттан уопсайа – 771321 тест).
Ольга Балабкина өрөспүүбүлүкэ үрдүнэн эмтиир тэрилтэлэр бары ыарыһахтары былааннаах көрүүнү сөргүппүттэрин эттэ. Маны таһынан, кини сотору Саҥа дьыл бырааһынньыктара саҕаланалларынан, бэлэҕи-туһаҕы билиҥҥиттэн ылан хаһааналларыгар ыҥырда, ити ахсынньы бүтүүтэ маҕаһыыннарга дьон тоҕуоруспатын таһаарыа этэ диир.
