Өтөрүнэн турбатах бытарҕан тымныылар сатыылааннар, Саха сиригэр сөмөлүөт көтүүтэ эмиэ биллэ атахтанна. Дьокуускай аэропордун таблотугар “задержка”, “отменен” диэн суругу элбэхтэ көрөҕүн. Хаайтарыы бөҕө буолла. Салгын аалынан эрэ сырыылаах улуустарга ити ордук охсуулаах буолла.
Биһиги кэллиэгэбит Майя Акимова дойдутугар – Эбээн Бытантай улууһугар дьиэ кэргэнин кыһалҕатынан көппүтэ. Кини бэҕэһээ Дьокуускайга көтөн кэлиэхтээҕэ да, будулҕан туман, бытарҕан тымныы сатыылаан, Саккырыырга хаайтаран сытар.
Саккырыыртан Дьокуускайга дылы нэдиэлэҕэ иккитэ сөмөлүөт көтөр – бэнидиэнньиккэ уонна бээтиниссэҕэ. “Полярные авиалинии” авиахампаанньа эрэ көтөр. Ол эрээри, ааспыт бэтиниссэттэн ыла сөмөлүөттэр кыайан көппөккө тураллар. Кыһалҕалаах киһи куораты булара улаханнык уустугурда.
Аны туран, Эбээн Бытантай улууһугар тохсунньу саҕаланыыта хоруона хамсыга көрдүгэннээбитэ. Саҥа Дьыл саҕана устудьуоннар дойдуларыгар кэлээри, ыарыы бэлэхтээх үктэмииттэр. Инньэ гынан, Кустуур курдук суола-ииһэ суох, кый ыраах дэриэбинэҕэ ыарыы эмискэ турбут. Билигин балаһыанньа арыый буолла диэн улуустааҕы киин балыыһа кылаабынай бырааһын эмп-томп чааһыгар солбуйааччыта Мария Прокопьева иһитиннэрэр.
Саккырыыр балыыһатыгар кыһыл зонаҕа 4 киһи эмтэнэ сытар, олортон икки киһи туругун “средней степени тяжести” диэн эмчиттэр быһаарбыттар, 2 киһи балыыһаттан тахсаары бэлэмнэнэр. Атыттар дьиэҕэ сытан эмтэнэллэр. Кустуурга уонна Саккырыырга анал ковиднай биригээдэ тэриллибит. Улууска 3 ИВЛ аппараата баар эбит: биир саҥаны соторутааҕыта аҕалан холбообуттар. Сэтинньигэ реаниматолог быраас “Земскэй доктор” бырагырааманан үлэлии кэлэн, эбээн бытантайдар көмүскэллээх курдук санаммыттар. Билигин 11 киһи амбулаторно эмтэнэр, кинилэри эмчиттэр кыраҕатык кэтээн көрөллөр. Улууска бэйэтигэр ИФА анаалыһын оҥорор буолбуттар. Оттон ПЦР анаалыһын куоракка эрэ ыыталлар.
Кэллиэгэбит Майя Акимова өр кыайан хаалла сытар кыаҕа суох буолан, бүгүн эбиэт кэнниттэн Саккырыыртан бензовоһунан Баатаҕайга дылы айанныырга күһэллибит. Баатаҕайтан билиҥҥитэ сөмөлүөттэр туох да харгыһа суох көтө тураллар, онон кыһалҕалаах киһи 11 чааһы быһа эрэйдэнэн айаннаан кэлэригэр эрэ күһэллэр. Аны туран, айан сыаната – 30 тыһ. солк.эбит! Анал таксыы эҥин суох, ким хайдах кэпсэтэн кэлэринэн. Майя Акимова бу сырыыга улууһун дьонун ПЦР анаалыстарын куоракка илдьэ кэлээри, анаалыстаах контейнеры кыбынан иһэр. Куоракка сөмөлүөт кыайан кэлбэккэ турар буолан, ПЦР анаалыстарын түмүгэ биллэ илик дьон, анаалыс түмүгүн кэтэһэн харантыыҥҥа хаалла сыталлар. Онон, ойуурдаах куобах охтубатыныы, дойдулаах дьон бэйэ-бэйэлэригэр көмөлөстөхтөрүнэ эрэ быыһы-хайаҕаһы булалларыгар тиийэллэр.
