Хоруона хамсыгынан ыалдьыы туруга син-биир бэрдэ суох. Өрөспүүбүлүкэтээҕи ковид-19 утары охсуһар штаб иһитиннэрбитинэн, ааспыт суукка устата Мииринэй оройуонугар отут киһи хамсыкка ылларда.
Ыал-ыалынан ковиднай госпитальга кииритэлии турар. Онно төрүөт элбэх. Элбэх кэлиилээх-барыылаах оройуон буолан, хоруона хамсыгынан ыалдьыбыт дьон кэлэ тураллар. Кафелар, эрэстэрээннэр, остолобуойдар, спортивнай стадионнар, тренажернай саалалар үлэлии олороллор.
Маҕаһыыннарга дьон мааската суох тоҕо анньан киирэллэр. Социальнай дистанцияны билиммэттэр. Антисептигынан туһамматтар.
Мииринэй оройуонугар хоруона хамсыгын утары дьаһаллар лаппа сымнаабыттарын, быраабыланы кэһии түмүгэр, ыарыһах ахсаана өссө да үксүү турар кутталлаах.
Хамсык хаамыыта маннык:
Тохсунньу 21 күнэ - 25 ыарыһах.
Тохсунньу 22 күнэ - 24.
Тохсунньу 23 күнэ - 25.
Тохсунньу 24 күнэ - 27.
Тохсунньу 25 күнэ - 31.
Тохсунньу 26 күнэ - 34.
Тохсунньу 27 күнэ - 23.
Тохсунньу 28 күнэ - 30.
Үлэ нэдиэлэтэ саҕаламмыт тохсунньу 11 күнүттэн бүгүҥҥэ диэри – 371 киһи хоруона хамсыгынан ыарыйда.
Станислав Алексеев. Мииринэй куората.
