Хоруона дьаҥын утары быһыыны ордук саастаах дьоҥҥо биэрэ сатыахтара. Бу туһунан Ил Дархан уонна бырабыыталыстыба дьаһалтатын пресс-сулууспата суруйар.
Роспотребнадзор Саха сиринээҕи салаата иһитиннэрбитинэн, ааспыт нэдиэлэҕэ өрөспүүбүлүкэҕэ эпидемиологическэй турук бигэтийбит. Сууккаҕа ортотунан 80-90 киһи ыалдьа турбут. Билигин быраастар 36 ыар уонна 11 ордук ыар туруктаах ыарыһахтар тыынарын иһин охсуһаллар. Вакцинация бары улуустарга көхтөөхтүк бара турар, эбии 15 тыһ. доза вакцина кэлэрин кэтэһэллэр. Уопсайа Саха сиригэр 44 тыһ. доза кэлиэхтээх. Айсен Николаев суһал штаб мунньаҕар эбии вакцина кэллэҕинэ биир бастакынан ордук саастаах дьоҥҥо бэриллиэхтээҕин эппит. Тоҕо диэтэххэ, кинилэр бу ыарыыга ордук бэримтиэлэр.
