Оҕолору сырдыкка-кэрэҕэ угуйа
Дьокуускай куораттааҕы полиция отделларын инспиэктэрдэрэ, учуокка турар оҕолорго анаан бэрт интириэһинэй тэрээһин ыыттылар. «Брейн-ринг» диэн ааттаах интеллектуальнай өй-санаа күрэҕэ, «Zoom» сыһыарыы нөҥүө, онлайн таһымҥа ааста.
ИДЬМ пресс-киинэ иһитиннэрэринэн уопсайа оонньууга сэттэ хамаанда кытынна. Ол курдук: 1, 2 нүөмэрдээх полиция отделларыттан, Жатайтан уонна иккилии хамаанда 3,4 нүөмэрдээх полиция отделларыттан. Хас биирдии учаастактан хастыы да бөлөх турда, инспиэктиэрдэр оҕолору кичэллээхтик хас да бөлөххө арааран дьэ ким бастыыр эбитий диэн көхтөөх күөн күрэс биллэрдилэр.
Оонньуу ис хоһооно – эрдэттэн полиция үлэһиттэринэн бэлэмнэллибит өй-санаа тургутуктарыгар хоруйдааһын. Оҕолор хас биирдии бэйэлэрин хамаандаларыгар туспа аат, девиз толкуйдаатылар.
Ооонньуу олус көхтөөхтүк, биир тыынынан ааста. Оҕолор үрүт үөһэ түһэ-түһэ, илин-кэлин түсүһэн бэйэлэрин киэҥ билиилэрин, кругозордарын көрдөрдүлэр.
Бастакы миэстэни – ааттыын бастакы нүөмэрдээх полиция отделын хараҕын далыгар сылдьар иитиллээччилэрэ ыллылар, иккис миэстэҕэ төрдүс отдел үлэни ыытар оҕолоругар тигистэ.
Туох баар бу онньууга кыттыбыт оҕолорго минньигэс бэлэхтэр биэрдилэр. Кыайыылаахтарга «Киин» киинэ тыйаатырыгар итиэннэ Нуучча тыйаатырыгар билиэттэр туттарылыннылар.
ИДЬМ пресс-киинэ
