Эрэгийиэн Минтраһыгар бэлиэтииллэринэн, федеральнай суолга бу сыл олунньутуттан муус устарыгар диэри 7 таксинан айаннааччы суорума суолламмыт уонна 14 киһи араас эчэйиини ылбыт. Силиэстийэ ДТП буолбут кэмигэр суоппардар дьону таһарга анал көҥүллэрэ суоҕун, эбэтэр массыына тахограба суох эбитин быһаарбыт.
“Саха сирин уустук суоллаах-иистээх усулуобуйатыгар тахограф хонтуруола күүһүрэрэ суоппар сылайарыттан уонна сөптөөх түргэни тутуспаттан сылтаан суол-иис быһыылаана тахсарын бохсорго туһалаах. Сэкириэт буолбатах, өрөспүүбүлүкэни аймаабыт киһи өлүүлээх ДТПлар, чуолаан, мантан сылтаан буолбуттара”, – диир тырааныспар миниистирэ Семен Винокуров.
Министиэристибэҕэ улуустар икки ардыларынааҕы такси быһылаанын кыччатарга Көлө федеральнай сулууспатын Хотугулуу-Илиҥҥи управлениетыгар (МУГАДН) иниспиэктэр ахсаанын элбэтэр наада дииллэр. Холобур, Дьокуускайга Көлө надзора 7 үлэһиттээх, Нерюнгрига – 2, Бүлүү уонна Ленскэй куораттарыгар биирдии үлэһиттээхтэр.
МУГАДН бу сыл саҕаланыытыгар эрэ 8-тан элбэх миэстэлээх массыынанан дьону таһарга диэн 850 лиссиэнсийэни биэрбит.
“Өрөспүүбүлүкэҕэ сөптөөх көрөр-хонтуруоллуур үлэни олохтуохха, суолга сэрэхтээх буолуу үлэтин күүһүрдүөххэ, суоппардар уонна дьону таһааччылар эппиэтинэстэрин үрдэтиэххэ наада”, – диэн бэлиэтиир Семен Винокуров.
Онтон эрэгийиэннэр ардыларынааҕы суол туһунан этэр эбит буоллахха, арыый да ама. Ол курдук, манна уотунан сырдатыы, ПДДны кэһиини хаартыскаҕа түһэрии уонна видеофиксация систиэмэлэрин үлэлэтэр эрэгийиэннээҕи бырагыраамалар үлэлииллэр.
2017 сылга ПДДны кэһиини хонтуруоллуур систиэмэ көмөтүнэн дьалаҕай суоппардартан 92,8 мөл. солк. тутуллубут. Бу үп эрэгийиэн суолга сэрэхтээх буолууну хааччыйар пуондатыгар киирбит.
