2021 сыл кулун тутар 27 күнүгэр Горнай улууһугар кэрэ-бэлиэ күн үүннэ: айылҕа гааһа Бэрдьигэстээх сэлиэнньэтигэр холбонно. Олохтоохтор аны күөх төлөнтөн дьиэлэрин-уоттарын ититинэр кыахтаннылар.
«Өр күүппүт баҕа санаабыт туолла! Дьэ, оһох оттон бүттэхпит, дьиэбитин толору хааччыллыылаах оҥорор кыахтанныбыт. Ханна гаас тиийбит сиригэр – сайдыы. Биһиги бу дьоро күҥҥэ олус үөрэбит, уонна ис сүрэхпититтэн махтанабыт гаас ситимин биһиги дьиэлэрбитигэр тиэрдэргэ үлэлэспит туох баар үлэһит дьоҥҥо!» - диэн үөрүүтүн үллэстэр Бэрдигэстээх сэлиэнньэтин олохтооҕо Альбина Алексеева.
Газовик-тутааччылар тустарыгар киэн туттуу сырдык кыыма биһиги сүрэхтэрбитин толорбута, күөх төлөн факела күлүмнүү умайбытыгар олохтоохтор «Ураа!» диэн хаһыытаспыттарыгар.
Саха сирин Аҕа Баһылыга Айсен Николаев Бэрдьигэстээх олохтоохторун айылҕа гааһа кинилэр дьиэлэригэр-уоттарыгар ыкса тиийэн кэлбитинэн итиитик-истиҥник эҕэрдэлээтэ. Кини бэлиэтээтэ, кэнники сылларга бөһүөлэк биллэ уларыйбытын, киэркэйбитин, саҥа аныгылыы быһыылаах-таһаалаах дьиэлэр тутуллубуттарын, суол-иис тупсубутун, уопсастыбыннай эйгэлэр-түөлбэлэр үөскээбиттэрин, айылҕа гааһа кэллэҕинэ дьон олоҕун таһыма өссө тупсуо диэн бигэ эрэл санаатын биллэрдэ. Манна гаас кэлиитэ - быйыл Бэрдьигэстээххэ «Манчаары оонньуулара» ыытыллалларын кытары дьүөрэлэһиитэ соччонон үөрүүлээх, долгутуулаах түгэн диэн бар дьонун эҕэрдэлээтэ Айсен Николаев.
«Бүгүн кэрэ-бэлиэ күн. Горнай улууһун гаастааһын 2004 сылтан саҕаламмыта. Маҥнайгынан, 2007 сыллаахха айылҕа гааһыгар – Бэс күөл бөһүөлэгэ холбоммута, нь::ү сыллаахха – Күөрэлээх, оттон 2016 сыллаахха – Аһыма. 2016 сыллаахтан Аһыматтан – Бэрдьигэстээххэ диэри магистральнай газопровод тардыыта саҕаламмыта. Бүгүҥҥү күн туругунан гааска тоҕус дьиэ холбонно, 450 дьиэҕэ утах ыкса тардылынна. Күһүөрү иккис, үһүс кэрдиистэр барыахтара, эбии өссө 300 дьиэҕэ гаас киллэриэхпит.”Тыа сирин комплекснай сайыннарыы” федеральнай бырагыраамма чэрчитинэн бөһүөлэк иһинээҕи үлэлэр тиһигин быспакка салҕанан баран иһэллэр. Айылҕа гааһа кэлиитэ – дьон олоҕун таһыма үрдээһинэ, ону кытары биһиэхэ эбии үлэбит кээмэйэ элбиир, эбии эппиэтинэс сүгэбит», - диэн бэлиэтиир «Сахатранснефтегаз» АУо генеральнай дириэктэрэ Алексей Колодезников.
Бу күн, бөдөҥ нефтегазовай тэрилтэ салайааччыта Горнай улууһун гаастааһынын хааччыйар хаһаайыстыба үлэллир эбийиэктэрин көрдө-иһиттэ, миэстэлэригэр үлэһиттэри кытары көрүстэ. Автоматизированнай газораспределительнай станция үлэтин-хамнаһын билистэ, хонтуруоллуур-кээмэйдиир оборудование уонна автоматическай салайыы системата ньир-бааччы үлэлии туралларын көрдө. Гаас температуратын көрдөрүүтэ уонна онтон да атын дааннайдар барыта газотранспортнай система Киин диспетчерскай салалтатыгар көстө туруохтара, ол туох эмит ыксалаах түгэн буоллаҕына тутатына дьаһал ыларга тирэх буолуоҕа.
Горнай улууһун, Бэрдигэстээх сэлиэнньэтин хааччыйар хаһаайыстыбатыгар 17 киһи үлэлиир – барыта олохтоох дьон. Инникитин былааннарга – штаты улаатыннарыы, уонна онно олоҕуран аварийнай-диспетчерскай сулууспа тэрийии.
«Сахатранснефтегаз» АУо пресс-киинэ
