Тас дойдуга олохсуйбут сахалары түмэр "Саха диаспора" уопсастыбаннай тэрилтэ салайааччыта, АХШ Вирджиния штатын Фэйрфакс куоратын Джордж Мэйсон университетын үлэһитэ Вера Соловьева наука дуоктара истиэпэнин көмүскээтэ.
Вера Соловьева үлэтэ билиҥҥи үйэҕэ ордук тоҕоостоох:"Изменение климата в Оймяконе: как знания и опыт коренных жителей могут помочь в адаптации и изменении стратегии мировой экологической политики" диэн. Кини үлэтэ үрдүктүк сыаналанан, Джордж Мэйсон университетын билимҥэ дуоктара истиэпэнэ иҥэрилиннэ. Вера Соловьева дьиэ кэргэнин кытары АХШ 1997 сылтан олохсуйан олорор, төрөөбүт дойдутун кытары ситимин билиҥҥээҥи диэри быспат.
