Суоппар киһини ааҥҥа кыбыппыт уонна дьон түһүөхтээх тохтобулларыгар тохтообокко ааһан бара турбут.
News.Ykt.Ru эрэдээксийэтигэр куорат олохтооҕо кэлэн, бэҕэһээ киэһэ, муус устар 14 күнүгэр, “Племобъединение” тохтобулга, 102 №-дээх оптуобуска буолбут быһылаан туһунан кэпсээтэ.
-“Киэһэ тоҕус чаас ааһыыта, биһиги – уолум, кийиитим, мин буолан “Племобъединение” тохтобулга баран испиппит. Бириэмэ хойут этэ, оптуобус сырыыта тохтоон эрэрэ, биһиги тохтобулга 102 №-дээх оптуобус чугаһаан эрэрин көрбүппүт, мин атаҕым ыалдьар сатаан түргэнник хаампаппын, ол иһин уолбун көрдөспүтүм эрдэ сүүрэн тиийэн суоппартан кэтэс диэн көрдөһөрүгэр», - диэн кэпсиир куорат олохтооҕо Марианика Петровна.
Дьахтар кэпсииринэн, кинилэр оптуобуска утары баран иһэр буоланнар суоппар кинилэри көрбөтөх. Кини этэринэн, уола сүүрэн тиийэн оптуобус аанын айаҕар туран суоппартан күүтэ түһэригэр көрдөспүт, онуоха суоппар аанын сабан уолу кыбытан баран салгыы айанныы сатаабыт. Бу бириэмэҕэ уол кэргэнэ уонна ийэтэ сүүрэн кэлэннэр ааны арыйтарбыттар уонна салоҥҥа киирбиттэр.
-Мин суоппартан ыйыппытым:“ Тоҕо эһи биһигини күүппэтигит, киһини аанынан кыбыттыгыт диэн?” – салҕыыр Марианика. – Хардатын, суоппар олорор олбоҕуттан салоҥҥа тахсан биһиэхэ хаһыытаан барбыта: «Тоҕо мин ааммын алдьатаҕыт диэн?» Этиһэ туруохпун баҕарбакка мин киниэхэ: «Үлэлиир миэстэҕитигэр төннүҥ» - диэбитим. Бука, ол тылларым иһин кини миэхэ өһүргэннээҕэ. Ол кэннэ, биһигиттэн биир пассажирка дьахтар ыйыппыта: «Ким эһигиттэн суоппарга холустук хардардай?» - диэн. Мин киниэхэ, биһигиттэн киниэхэ ким да холустук хардарбатаҕа, суоппар маҥнайгынан биһиэхэ хаһыытааан барбыта диэн. Кэлин тиһэҕэр мин ЯПАК диспетчерскэй сулууспатыгар эрийэн бу быһылааны кэпсээбитим кэннэ биирдэ, 15 мүнүүтэ буолан баран биирдэ оптуобус оннуттан хоҥнубута.
- Мин кинини видеоҕа устан барбытым, ааккын-суолгун билиһиннэр диэн көрдөспүтүм. Бу видеоҕа көстөр хайдах курдук быдьардык биһигини кытары кини кэпсэтэрэ. Бүтэһигэр, биһиги түһүөхтээх тохтобулбутун быдан ааһан баран, кини биһигини быдан ыраах, чиэски сиргэ түһэрбитэ абалаах. ЯПАК салалтата маннык намыһах култуурунай таһымнаах суоппардар кинилэргэ үлэлиллэригэр күүстээх болҕомто ууруон баҕарабын.
МУП “ЯПАК” дириэктэрэ Валерий Домотов News.Ykt.Ru эрэдээксийэтигэр бу быһылааҥҥа бэрэбиэркэ бара турар диэн иһитиннэрдэ.
-“Тэрилтэ бу быһылаан туһунан барытын билэн олорор. Кытаанах бэрэбиэркэ бара турар. Тохтобулу ааһа баран дьону аанньа ахтыбакка, ыраах түһэртээбитигэр биһиги иҥэн-тоҥон туран навигация систиэмэтин көмөтүнэн, эргитэн бэрэбиэркэлээн көрүөхпүт. Үлэтигэр дьалаҕайдык сыһыаннаспыта чахчы дакаастаннаҕына кытаанах миэрэлэри ылыахпыт”, - диэн бэлиэтээтэ Домотов.
