Хамсыгы өрөспүүбүлүкэ сиригэр-уотугар салҕыы тарҕаппат туһуттан ылыныллыбыт хааччахтыыр миэрэлэр, от ыйын 15 күнүгэр диэри уһатылыннылар. Саха сирин аҕа баһылыга Айсен Николаев бу уураахха бүгүн илии баттаата.
Уураахха саҥа эбии хааччахтааһыннар киирдилэр
Саҥа уураахха этиллэринэн 14 саастарын ситэ илик оҕолор, төрөппүт арыалдьыта суох аралдьытар сирдэри, атыы-эргиэн кииннэрин, дьаармаркалары, ырыынактара уонна уопсастыбыннай аһылык тэрилтэлэрин кэрийэллэрэ көҥүлэммэт.
Ону таһынан, Дьокуускай, Мииринэй, Удачнай куораттар аэропортара саҥа көтөн кэлбит дьону эттэрин-хааннарын тэмпэрэтиирэлэрин мээрэйдиир эбээһинэһи хааччыйыахтаахтар. 37,1-тэн үөһэ кыраадыстаах дьону булар түгэннэригэр, кинилэр тустарынан сибиэдинньийэлэри бу дьон олорор эбэтэр быстах кэмҥэ кэлбит сирдэрин мэдьиссиинискэй тэрилтэлэригэр ыытарга, итиэннэ даанайдары туһанааччылар бырааптарын көмүскүүр Саха сиринээҕи Федеральнай Сулууспа Салалтатыгар.
Өлүөхүмэ оройуонугар ыытыллар Олоҥхо Ыһыаҕынан уонна Горнай улууһугар ыытыллар «Манчаары оонньуулара – 2021 » XXI cпорт национальнай көрүҥнэригэр ыытыллар спартакиаданан сибээстээн, аҕа баһылык уурааҕар уларыйыы киирдэ, бу тэрээһиннэр буолаллара көҥүллэнэр, өскүтүн Саха сирин судаарыстыбыннай кылаабынай бырааһа сөбүлэҥин биэрбит уонна Олоҥхо Ыһыаҕын, Манчаары Оонньууларын тэрийэр кэмитиэттэрин бэрэссэдээтэллэрэ бигэргэппит саньытаарынай боротокуоллара тутуһуллар буоллаҕына.
Докумуоннар булгуччу ирдэбиллэрэ: бары кыттааччылар хайаан да хамсыгы утары быһыыны ылбыт буолуохтаахтар, култуурунай-маассабай тэрээһиннэр кыттааччыларын уонна көрөөччүлэрин ахсаана, уораҕайга уопсай батар дьон толору ахсааныттан аҥаарын куоһарыа суохтаах. Саньытаарынай боротокуолларга хамсыгы булар быһыыга-майгыга персонал хайдах дьайыылары ылыныахтааҕа барыта ыйылла сылдьар.
