20-саастаах Мэҥэ-Хаҥалас олохтооҕор бириигэбэр таҕыста, кини ааптар быраабын кэһиигэ буруйдааҕынан ааҕылынна, диэн иһитиннэрэр өрөспүүбүлүкэ борокоротууратын пресс-сулууспата.
Суукка быһаарыллыбытынан, буруйдаах 2021 сыл олунньу ый саҥатыгар киинэ тыйаатырыгар, «Хара хаар» киинэни төлөппүөнүн хаамыратыгар уоран уһулан ылбыт. Салгыы, киинэни айбыт тус бырааптаах киһиттэн туох да ыйытыыта, көҥүлэ суох устуутун ютубка таһаарбыт, киинэ аатын уларытан.
Бэлиэтэммитинэн, уон биэс күн устата устууну сотуохтарыгар диэри, киинэ куйаар эйгэтигэр угуллубут куопуйатын номнуо 4,7 тыһ. тахса дьон көрбүттэр.
«Ааптар быраабын кэһии түмүгэр, киинэни айбыт тус бырааптаах киһиэхэ улахан кээмэйдээх хорумньу оҥоһуллубут, куоттарыллыбыт барыыс быһа холоон биир мөлүйүөн 400 тыһ.солк. тахса ааҕыллыбыт», - диэн этиллэр иһитиннэриигэ.
Буруйданааччы АФ ХК 146 ыстатыйатынан, 3 ыстатыйатынан, «в» пуунунан буруйдааҕынан ааҕылынна (улахан хорумньуну таһааран туран, ааптар быраабын сокуону кэһэн туһаныы).
Суут эр киһини икки сыл көҥүлүн быһарга уураахтаата, балтараа сыл тургутан көрөргө усулуобунай болдьохтоох. Бириигэбэр сокуоннай күүһүгэр киирэ илик.
