Стопкоронавирус.рф федеральнай саайт дааннайдарыгар сурулларынан, Саха сиригэр бу сыстыганнаах хоруона хамсыгыттан 768 киһи суорума суолламмыт.
Бүтүн бөдөҥ нэһилиэк нэһилиэнньэтин саҕа биир дойдулаахтарбытын бу абааһы ыарыыта илдьэ барбыт. Киһи дьиксинэр сыыппарата. Билигин да 70 киһи ыарахан туруктаах реанимацияҕа сытар. Бэс ыйын 29 күнүгэр 3 киһи суорума суолламмыт.
Хамсык саҕаланыаҕыттан, өрөспүүбүлүкэҕэ уопсайа 41230 киһи ыалдьыбыт, 37462 киһи үтүөрбүт.
Хоруона хамсыгыттан быһыы эрэ быыһыыр. Вакцина биллэн турар 100 бырыһыан мэктиэлээбэт, ол эрээри ыалдьыбыт киһи чэпчэкитик аһарынар. Быһыыны ылбыт 400 киһи ыалдьыбытыттан сэдиптээтэххэ, кинилэр ыарыыны чэпчэкитик аһарыммыттар. Онон вакцинаны ылар хйаан да наадатын этэллэр.
