Уокуруктааҕы дьаһалта пресс-сулууспата иһитиннэрэринэн, куорат аҕа баһылыга Евгений Григорьев уопсай куораттааҕы мунньах кэмигэр, сотору кэминэн Дьокуускайга медвытрезвитель арыллыытын туһунан боппуруоһу ырытыһарга диэн тыл көтөхтө.
Кини эттэ; «Медвытрезвителлар тустарынан сокуон федеральнай таһымҥа ылыллыбыта. Онуоха эппиэттир сокуоннай докумуоннар Арассыыйа Доруобуйатын Харыстабылын министиэристибэтин уонна ИДЬМ сөбүлэҥнэрин ылбыттара. Бу боппуруоһу ыкса ылсан, олоххо бигэтик киллэрэргитигэр көрдөһөбүн».
Медвытрезвитель үбүлээһинэ олохтоох дьаһалта-чааһынай дьон уонна бүддьүөт көмөлөрүнэн үбүлэнэр кыахтаах буолуон сөбүн туһунан боппуруоһу көрөргө, куорат аҕа баһылыга соруйда.
«Итирэн-кутуран сылдьан бэрээдэги, сокуону кэһэн дьон олорор, сыннаьанар уопсастыбыннай сирдэргэ гражданнарга кутталы үөскэтэр дьону оннуларын булларарбыт – бу бүгүҥҥү күннээххэ куорат олоҕор – биир сүрүн сорукпут», - диэн бигэтик, тоһоҕолоон туран бэлиэтээтэ Евгений Григорьев.
Санатар эбит буоллахха, 2020 сыллаахха, ахсынньыга Судаарыстыбыннай Дуума анал тэрилтэлэри – медвытрезвителлары сөргүтүү туһунан федеральнай сокуон ылбыта. Бу тэрилтэлэр – алкогольнай эбэтэр наркотическай итирии туругар киирбит дьоҥҥо көмө оҥорор аналлаах буолуохтара.