Хамсыгы утары быһыы ылбыт уонна соторутааҕыта бүтэһик алта ый иһигэр дьаҥынан ыалдьа сылдьыбыт дьоҥҥо, бу ирдэбил тарҕаммат.
Саха сирин аҕа баһылыгын уонна бырабыытылыстыбатын пресс-сулууспата иһитиннэрэринэн, от ыйын 15 күнүгэр, Айсен Николаев хамсыгынын сибээстээн хааччахтыыр миэрэлэри уһатарга диэн уураахха илии баттаата. Болдьох от ыйын 16 күнүттэн, атырдьах ыйын 30 күнүгэр диэри салҕаныа.
Уураахха этиллэринэн, хамсыгы утары быһыыны ылбыт, эбэтэр 72 чаас иннинэ ПЦР, ИХА үтүө түмүктэрин аҕалбыт гражданнар, ыарыыттан куттала сирдэр реестрдарыгар киирбит тэрилтэлэргэ сылдьарга, мааската суох уонна социальнай арыты тутуспакка сылдьаллара көҥүллэнэр.
Иһитиннэриигэ этиллэринэн: «Уоппускаттан тахсыбыт үлэһиттэр булгуччу хамсыгы быһаарар тест туттарыахтаахтар уонна ПЦР эбэтэр ИХА ньыманан оҥоһуллубут, кинилэргэ ыарыы суоҕун туоһулуур лабараторнай чинчийии түмүгүн аҕалан көрдөрүөхтээхтэр».
Лабараторнай ИФА эбэтэр ИХА анаалыһа, уоппускаттан үлэҕэ тахсыах иннинэ, 72 чаас эрдэ оҥоһуллубут буолуохтаах. Өскөтүн уоппуска кэмэ икки халандаарынай күнтэн уһуна суох буоллаҕына, итиэннэ хамсыгы утары быһыы ылбыттарга, үлэҕэ тахсалларыгар маннык тест туттараллара ирдэммэт.
Үөһээ ирдэммит анаалыстары чинчийэр-оҥорор тэрилтэлэр, гражданнар ПЦР эбэтэр ИХА түмүктэрин Роспотребнадзор Киин үөрэтэр-чинчийэр үнүстүтүүтүгэр атаарар эбээһинэстээхтэр. Бу ирдэбил, сымыйа ыспыраапкалары хонтуруоллуур сыалтан олоххо киллэрилиннэ.
От ыйын 24 күнүттэн, гражданнар, хамсыктан босхоломмут тэрилтэлэргэ сылдьарга (COVID-free зоналарга), «Госуслуги.Стопкоронавирус» Биир кэлим судаарыстыбыннай уонна муниципальнай өҥөлөрү оҥорор портал нөҥүө ылыллыбыт QR куоду көрдөрөр буолуохтара.
